Reshjet e dendura të shiut në Fier, Patos, Mallakastër dhe Roskovec, pa probleme të raportuara
Reshjet e dendura të shiut, të rëna gjatë orëve të para të mëngjesit të sotëm, nuk kanë shkaktuar probleme në bashkitë Fier, Patos, Mallakastër dhe Roskovec.
Sipas informacioneve dhe raportimeve të deritanishme, nuk janë raportuar rrëshqitje dherash apo bllokime të rrugëve. Po ashtu, nuk ka pasur probleme me furnizimin me ujë të pijshëm dhe energji elektrike.
Megjithëse reshjet kanë qenë të konsiderueshme, në disa zona janë vërejtur grumbullime të ujërave sipërfaqësore në tokat bujqësore. Megjithatë, uji është larguar brenda pak minutash, duke mos shkaktuar probleme të raportuara. Kjo lidhet edhe me kushtet e tokës pas periudhës së thatësirës së javëve të fundit.
Ndërkohë, deri më tani nuk raportohen dëme në sera, veçanërisht në zonën e Roskovecit, ku bujqësia përbën një nga sektorët kryesorë të ekonomisë lokale.
Përveç mungesës së problematikave, reshjet konsiderohen të dobishme për bujqësinë, sidomos për ullishtet. Lagështia e tokës ndihmon në zhvillimin e kokrrave të ullirit dhe krijon kushte më të favorshme për prodhimin e vajit të ullirit, duke ndikuar në cilësinë e tij.
Situata në të katër bashkitë paraqitet e qetë, ndërsa vijon monitorimi i kushteve atmosferike dhe i ndikimit të reshjeve në zonat urbane dhe rurale.
