Naomi Campbell në qendër të dosjeve të reja për Jeffrey Epstein
Naomi Campbell dhe Jeffrey Epstein kanë shkëmbyer ftesa për evente dhe janë takuar për vite me radhë para vdekjes së këtij të fundit, sipas dokumenteve të reja të publikuara nga United States Department of Justice.
Dokumentet zbulojnë komunikime mes supermodeles dhe financierit të dënuar për krime seksuale, që kanë vazhduar edhe pasi Epstein kreu 13 muaj burg në vitin 2008 për kërkim prostitucioni nga një e mitur. Emri i Campbell, 55 vjeç, shfaqet më shumë se 250 herë në dosje.
Sipas dokumenteve, Campbell dhe Epstein janë njohur në vitin 2001 gjatë festës së ditëlindjes së saj në Saint-Tropez, ku ai ishte i ftuar nga i dashuri i saj i asaj kohe, Flavio Briatore. Në festë ishte e pranishme edhe bashkëpunëtorja e Epstein, Ghislaine Maxwell.
Avokati i Campbell, Martin Singer, deklaroi për The Times se Epstein dhe Maxwell “qëndruan rreth 20 minuta” në festë. Ai këmbënguli se klientja e tij nuk kishte dijeni për “sjelljen e tij kriminale të neveritshme deri pas arrestimit të vitit 2019” dhe se pas kësaj periudhe nuk kishte më kontakt me të.
Sipas dosjeve, Campbell e ka ftuar Epstein në disa evente përgjatë 15 viteve, përfshirë ditëlindjen e saj në 2004 në Saint-Tropez dhe një festë të organizuar nga Dolce & Gabbana në vitin 2010, me rastin e 25-vjetorit të bashkëpunimit të saj me markën. Në një email përgjigjeje për një nga ftesat thuhej: “Jeffrey do të vijë plus dy persona, nëse është e mundur.”
Campbell figuron gjithashtu në një dokument me titull “List of People Who Need JE’s Address!”, ku jepen udhëzime për dërgimin e letrave dhe librave në burgun e Floridës ku Epstein ishte i mbyllur në vitin 2008.
Megjithatë, Singer deklaroi se Campbell “nuk e di kush e ka krijuar këtë listë dhe pse emri i saj shfaqet aty” dhe se ajo “nuk i ka kërkuar askujt adresën e Epstein për të komunikuar me të në burg”.
Në vitin 2010, më pak se një vit pas lirimit të Epstein nga burgu, Campbell e ftoi atë në festën e 40-vjetorit të saj në Cannes, Francë. Ftesa theksonte se ishte një event privat për miqtë dhe familjen më të ngushtë. Sipas avokatit të saj, Epstein nuk mori pjesë në festë.
Dosjet përmbajnë gjithashtu emaile të vitit 2016, ku Campbell kërkonte të përdorte avionin privat të Epstein për një udhëtim nga New York në Miami. Në fund, sipas dokumenteve, atij iu desh të largohej më herët për shkak të borës dhe u kërkua gjetja e një avioni charter për modelen. Pas vitit 2016 nuk rezulton të ketë komunikime të tjera mes tyre në dokumentet e publikuara.
