Skandali i filetove me salmonelë/ Ministrja Denaj: AKU do të shkrihet

Ministrja e Bujqësisë dhe Zhvillimit Rural, Anila Denaj ishte në studion e emisionit “Të paekspozuarit” për çështjen e skandalit të mishit të pulës me salmonelë. Ajo u justifikua se u morën të gjithë masat pas konstatimit të salmonelës duke akuzuar biznesin që kishte kryer importin se nuk ka bashkëpunuar për gjurmueshmërinë e produktit.

“Bëhej fjalë për një sasi fileto pule, e cila hyri në pikën doganore të Durrësit. Në planin e menaxhimit të marrjes së mostrave, një nga ngarkesat është vlerësuar për të marrë një mostër dhe për t’u analizuar. Janë analiza të akredituara nga Bashkimi Europian. Morëm rezultatin në 21 mars. Në momentin që AKU vihet në dijeni vijon kontrollin dhe gjurmueshmërinë.

Subjekti duhet që kur ka përgjigje nga Instituti i Sigurisë Ushqimore, ka detyrimin të informojnë se ku e ka tregtuar. AKU është gjetur në pamundësi të informacionit. Biznesi duhet të informojë dhe nuk e ka bërë. Nga ana tjetër, nuk ka lejua në njëfarë mënyrë kontrollin e plotë të gjurmueshmërisë. AKU ka referuar rastin për t’u ndihmuar nga hetimi tatimor, krimi ekonomik dhe policia, duke u referuar edhe në Prokurori” – u justifikua ministrja që nuk mundi të thotë se ku ka shkuar një pjesë e produktit.

“Pjesa më e madhe është gjendur, por nuk mund të shprehem sepse është në vlerësim të institucioneve. Sasia e kampionuar është diku te 7 ton. Nuk më lejohet të them se ka përfunduar në treg. Ne kemi gjurmuar dhe bllokuar, por sasia e gjurmuar do të dalë në përfundim të procesit të investigimit”, – tha Denaj duke folur edhe për një shkrirje të AKU-së.

“Në shtator të vitit të kaluar ka kaluar një ligj që do të vihet në zbatim deri në fund të vitit, me të gjitha aktet juridike që inspektoratet do të riorganizohen. AKU do të shkrihet dhe do të bashkohet me të gjitha inspektoratet e ushqimit. Të gjitha do të krijojnë një institucion që do të zbatojë politikat e tij, për peshkimin, për bimët, produktet e kafshëve dhe nuk do të varen nga një drejtor i përgjithshëm, as nga ministri, por nga një sistem i tërë, sepse nuk mund të menaxhojmë vetëm me njerëz, por nga tre nivele monitorimi”- tha Denaj.