Një azilkërkues shqiptar, i cili vdiq në anijen “Bibby Stokholm” ku mbahen emigrantët e paligjshëm, duke vetëvrarë kishte rrëfyer se po trajtohej si kafshë para vdekjes së tij, ka pohuar motra e tij. Gazeta “The Telegraph” mund të zbulojë se Leonard Farruku, 27 vjeç pagoi 4 mijë euro për të kaluar Kanalin me një varkë të vogël verën e kaluar.
Javën e kaluar u zbulua se azilkërkuesi shqiptar ishte ankuar për shëndetin e tij mendor një ditë para se të vdiste dhe sipas migrantëve të tjerë në anije ishte dëgjuar duke bërtitur dhe u përplasur në murin e kabinës së tij. Ai ishte gjallë kur azilkërkuesi me të cilin ndante kabinën e tij u ngrit për të shkuar në qendrën e IT. Stafi zbuloi trupin e Farrukut menjëherë më pas. Motra e tij Jola Dushku, 33 vjeçe, e cila jeton në Lombardi të Italisë, tha se ishte e tronditur nga lajmi, të cilin e morën vesh nga të afërmit në Mbretërinë e Bashkuar të kontaktuar nga policia që po hetonte vdekjen.
“Kur fola me të herën e fundit, ai më tha se kushtet në atë varkë nuk ishin të këqija, por ata trajtoheshin nga rojet si kafshë” – tha zonja Dushku. “Vëllai im, kur mbërriti në Mbretërinë e Bashkuar”, i dha Home Office adresën e të afërmve tanë në Londër. Ata u kontaktuan nga policia e cila u tregoi se çfarë kishte ndodhur. “Sipas të afërmve tanë që janë në kontakt me policinë, Leonardi atë natë në orën 23 të mbrëmjes ka pasur disa probleme dhe është qetësuar nga roja. Në orën 3 të mëngjesit ai u gjet i vdekur. Nuk kemi më shumë detaje se si ai vdiq.”
Mësohet se aktualisht janë 300 azilkërkues meshkuj të vendosur në anije. Ajo ka një kapacitet deri në 506 migrantë, të cilët qëndrojnë nga 2, 3 ose 4 në një kabinë. “Bibby Stockholm” ka pasur mjaft probleme që kur u ankorua në Portland në korrik, duke përfshirë çështje shëndetësore dhe sigurie. Ajo u evakuua në verë pas zbulimit të baktereve potencialisht vdekjeprurëse të legjionelës në furnizimin me ujë.
Vdekja vjen pasi një 23-vjeçar u përpoq të vriste veten në një parking hoteli në Essex muajin e kaluar, pasi dëgjoi se do të transferohej në Bibby Stockholm. Emigranti shqiptar mbërriti në Britaninë e Madhe me një varkë të vogël gushtin e kaluar si pjesë e një numri prej më shumë se 12 mijë shqiptarësh përgjatë Kanalit, një e katërta e të gjitha kalimeve vitin e kaluar. I lindur në fshatin Manëz, pranë qytetit të Durrësit, qyteti i dytë më i madh i Shqipërisë, motra e tij tha se ai erdhi në Mbretërinë e Bashkuar në kërkim të punës dhe për të siguruar leje qëndrimi të pacaktuar.
“Ai erdhi në Mbretërinë e Bashkuar me ëndrrën për të gjetur punë më të mirë dhe, më e rëndësishmja, për të marrë leje të pacaktuar për të qëndruar në MB”, tha zonja Dushku. Ajo tha se ata kishin humbur të dy prindërit e tyre, një humbje që ndryshoi vëllain e saj. “Leonardi u bë një person tjetër kur nëna jonë vdiq. Vdekja e saj e ndryshoi atë”, tha ajo.
Ajo tha se i riu shqiptar ishte i vendosur të merrte leje të pacaktuar për të qëndruar në Mbretërinë e Bashkuar, kështu që donte të “përmbushte të gjitha kërkesat e Home Office”. “Ai tha: “Po”, kur i thanë atij se akomodimi i tij i ri do të ishte në atë varkë ku ai kaloi ditët e fundit të jetës së tij,” tha ajo. “Unë do të gjej paqen në mendjen time vetëm kur të gjej të vërtetën e asaj që ndodhi atë natë në Bibby Stokholm,” tha ajo.
Anija është një nga 3 vendet kryesore të akomodimit për migrantët, e projektuar për të reduktuar koston prej 8 milionë paund në ditë për strehimin e azilkërkuesve në hotele. Dy të tjerat janë baza e papërdorur e RAF në Wethersfield në Essex dhe RAF Scampton në Lincolnshire, e cila ende nuk ka për të hapur.
Një zëdhënës i Home Office tha: “Ky ishte një incident tragjik dhe mendimet tona janë me të gjithë të prekurit. Mirëqenia e të gjithë atyre në kujdesin tonë është e një rëndësie të madhe dhe ne e marrim përgjegjësinë tonë për mirëqenien e tyre jashtëzakonisht seriozisht. Kjo tani do të hetohet nga policia dhe mjekësia ligjore. Është e drejtë që të vërtetohen faktet dhe rrethanat që lidhen me këtë vdekje.” ©Marrë nga “The Telegraph”, LAPSI.al
