Zjarri në Levan shkrumboi ullishtat dhe pemë! Rruga nacionale u bllokua për 5 orë

Gazetari Xhemil Beharaj raportoi për Syri Tv nga rruga nacional Levan Fier, aty ku një zjarr masiv ka shkaktuar panik dhe ka mbajtur të bllokuar rrugën nacionale për rreth pesë orë.

Për shkak të erës së fortë dhe intensitetit të lartë, flakët kanë kapërcyer rrugën nacionale përmes degëve të djegura, duke e kthyer zonën në një rrezik serioz për jetën dhe pronën.

Gazetari Xhemil Beharaj: Të përshëndes nga qarku i Fierit. Unë ndodhem i pozicionuar në rrugën nacionale Levan-Fier, ku janë pozicionuar automjete, një automjet i zjarrfikëses, autobot me ujë, ambulancë, forcat e policisë, të cilët janë në gatishmëri, ndërkohë që rreth 20 automjete zjarrfikëse janë duke punuar në terren duke shuar vatrat e zjarrit. Sipas burimeve zyrtare nga prefektura e Fierit, mësohet se rreth orës 19:30, dy helikopterë dhe një avion janë larguar nga territori i zjarrit për shkak se është errësirë, ka rënë errësira dhe janë larguar. Në terren kanë mbetur forcat e policisë, forcat zjarrfikëse të bashkisë, të ndërmarrjes pyjore, të cilët po punojnë në vatrat e zjarrit për të mbajtur zjarrin nën kontroll. Po thuajse ka rënë intensiteti i zjarrit, pohojnë burime zyrtare nga prefektura e Fierit.

Në këtë rrugë nacionale, shton gazetari janë djegur të gjitha pemët, ullishtat dhe shkurret.

Ndërkohë që gjithashtu të gjithë edhe banorët e zonës janë duke ndihmuar forcat zjarrfikëse për të shuar vatrat e zjarrit. Ka rënë intensiteti i erës, ka rënë intensiteti i zjarrit, çka do të thotë që është drejt shuarjes vatrat e zjarrit. Megjithatë, të gjithë punonjësit e zjarrfikëseve dhe ata të ardhur nga bashkitë e tjera, apo të Patosit, të Mallakastrës janë në terren dhe do të punojnë përgjatë gjithë natës, do të jenë në vatrat e zjarrit me qëllim për shuarjen e tyre për mos të lënë që ato të kenë mundësi të përhapen.

Të paktën kështu konfirmuan burime zyrtare nga prefektura e qarkut të Fierit. Do të shtoja faktin se rruga nacionale që lidh Fierin me Levanin ka qenë e bllokuar për gati katër-pesë orë, është hapur vetëm 30 minuta më parë dhe kjo për shkak të rrezikut që kishte nga ana e flakëve, se janë djegur të gjithë pyjet, shkurret dhe ullishtet. Disa prej pemëve, shkurreve, pemëve kanë rënë dhe bllokonin qarkullimin, u desh ndërhyrja e automjeteve të rënda, të cilat dhe të forcave të zjarrfikësve që të prisnin trungjet e pemëve dhe të hapnin rrugën për qarkullimin e automjeteve zjarrfikëse apo të autoboteve të ujit, të makinave të policisë, të ambulancave të cilat kanë qenë në gatishmëri.

Por tashmë, intensiteti i zjarrit ka rënë dhe janë arritur të fiken vatrat e zjarrit.

Ishte intensiteti shumë i lartë dhe era shumë e fortë e cila bënte të mundur kalimin e degëve të djegura që vinin në anën tjetër dhe bëheshin burim zjarri për vatrat e tjera. Gjithsesi, u evakuan familjet nëpër godinat që ishin afër vatrave të zjarrit dhe kjo për siguri. Nuk ka patur godina të djegura. Në shumë biznese që ishin përgjatë rrugës nacionale Fier-Levan, sidomos tek pylli i Levanit, tek liqeni i Levanit, në zbritje të qafës së Koshovicës, u larguan klientët nëpër lokale.

Stafi mori masat për të mbrojtur, nxorrën disa orendi që kanë lokale të jashtme, ndërkohë që u vunë në gatishmëri për të shuar vatrat e zjarrit, për të ndihmuar zjarrfikësit edhe për të treguar rrugët për të hyrë sa më shpejt pranë vatrave të zjarrit. Ndërkohë që ka qenë dy helikopterë që kanë ardhur rreth orës 15:30 dhe deri në orën 19:30 që kanë luftuar duke marrë ujë dhe për fat të mirë ka qenë dy rezervuarë pranë vatrave të zjarrit që mbusheshin me ujë dhe arritën që të fiknin vatrat e zjarrit. Siç e thashë dhe pak më sipër, intensiteti i flakëve ka rënë, forcat zjarrfikëse janë në terren, me gjithë forcat e policisë, çka do të rrinë përgjatë gjithë natës në gatishmëri.