“Kontrabandistët e njerëzve po fitojnë para dy herë, duke sjellë emigrantë të paligjshëm në Britani dhe duke ndihmuar kriminelët e kërkuar (përfshirë vrasës) që të arratisen përtej Kanalit. Shqiptarët po reklamojnë me paturpësi udhëtime emergjente në pjesën e pasme të kamionëve për “njerëzit që kanë probleme dhe duan të largohen sa më shpejt nga Anglia”. Kështu nis një shkrim i gjatë investigativ i tabloidit britanik “Daily Mail”. Njëri prej trafikantëve shqiptarë i tha një gazetari të infiltruar të “Daily Mail” që u paraqit si i afërmi i një burri në arrati pasi kishte vrarë dikë se ai mund të arratisej nga Britania në një vend të Europës që atë natë për 3 mijë £.
Një tjetër llogari e hapur nga një kontrabandist dhe që funksionon në TikTok ofron një shërbim me porosi prej 17 500 £ për t’u shpëtuar kriminelëve me dokumente të falsifikuara që e bënin atë si shoferi i dytë në kabinën e një kamioni. Trafikanti tha se truku përdorej në mënyrë rutinë për emigrantët e paligjshëm që hyjnë në Mbretërinë e Bashkuar.
Forcat e policisë britanike po ndjekin të paktën 38 kriminelë shqiptarë, përfshirë 9 të kërkuar për vrasje dhe 2 përdhunues, njëri që akuzohet për sulmin ndaj një fëmije. Të dyshuar të tjerë shqiptarë në arrati përfshijnë një mashtrues për 3 milionë paund, një abuzues në familje, një prodhues kanabisi, një tregtar kokaine dhe një të arratisur që i ka shpëtuar burgut. Dyshohet se disa prej tyre mund të jenë larguar nga Mbretëria e Bashkuar me ndihmën e kontrabandistëve.
Një reklamë e TikTok e gjetur nga Mail thotë: “Njerëzit me probleme që duan të largohen nga Anglia sa më shpejt të jetë e mundur duke shkuar në Francë ose Belgjikë në pjesën e pasme të kamionit. Çmimi 2500 sterlina”.
Një tjetër llogari në TikTok kishte mbi 140 video me reklama të tilla “për hyrje dhe dalje me kamion”. Ndërsa një faqe e tretë e drejtuar nga një bandë tjetër kërkon mesazhe të drejtpërdrejta nga “kushdo që dëshiron të kthehet në BE nga Anglia me kamion, njerëz me probleme që nuk mund të marrin një aeroplan. 100% garanci”.
Faqja kishte mbi 40 postime, shumë prej të cilave ofronin kalim të paligjshëm në Mbretërinë e Bashkuar ose me kamion ose me jaht “super komfort” dhe u kërkohej shqiptarëve në Francë ose Belgjikë të kontaktojnë.
Kur një gazetar i infiltruar i Daily Mail kontaktoi këtë faqe dhe la të dhënat e tij, ai mori një mesazh nga një kontrabandist shqiptar me një numër telefoni në Mbretërinë e Bashkuar. Në shkëmbimet e mëvonshme në WhatsApp, gazetari u justifikua se një i afërm i tij në Mbretërinë e Bashkuar duhej të arratisej sa më shpejt që të ishte e mundur, sepse ai kishte goditur me thikë një anëtar të bandës rivale që po përpiqej të grabiste shtëpinë e tij të kanabisit. Viktima kishte vdekur më vonë në spital. Historia ishte e sajuar.
Duke kërkuar vetëm 3 mijë £ për në Francë, kontrabandistit iu deshën vetëm disa minuta për të transmetuar një kod postar të një parku në periferi të Ashford, Kent, një autostradë e vogël nga tuneli i Channel dhe Dover. Takimi ishte për në orën 1 të mëngjesit. “Njeriu juaj duhet të jetë në atë adresë sonte. Është një restorant i vogël dhe një pikë karburanti. Shoferi do të jetë aty. Dorëzoi paratë shoferit dhe pa asnjë shqetësim ai do të jetë në Francë. Thuaji njeriut tënd se nëse shoferi kërkon detaje, t’i thotë që ka një problem urgjent familjar dhe dëshiron të dalë sa më shpejt”.
Një tjetër llogari kontrabandisti e quajtur “Travel Agency London” thotë se për 17 500 £ të merrte nga një banesë në Leeds. Ai premtonte një udhëtim në kabinën e një kamioni belg për të dalë jashtë Mbretërisë së Bashkuar duke të kompletuar me dokumente të rreme udhëtimi.
“Në kamion, ai nuk do të digjet. Askush nuk do ta gjejë dhe ta ndalojë atë. Mos u shqetëso. Ne sjellim njerëz nga Belgjika në Angli në kabinën e kamionit si shofer i dytë gjatë gjithë kohës” – thoshte kontrabandisti.
Të dyshuarit shqiptarë të kërkuar kanë arritur të arratisen nga Britania e Madhe në shumë raste. Eugert Merizaj u largua nga Britania e Madhe pasi kreu ekzekutimin e “planifikuar me përpikëri” të stilit prej bandash të një rivali të drogës në Hartlepool në vitin 2019. Ai bleu një sëpatë dhe lidhëse kabllosh për të ndihmuar në kryerjen e ekzekutimit ndërsa një tjetër anëtar i bandës shqiptare qëlloi me armë.
Pas një kërkimi ndërkombëtar, ai u gjet se jetonte në Belgjikë me një emër të rremë dhe u ekstradua në Mbretërinë e Bashkuar ku u dënua vitin e kaluar për vrasje dhe u burgos për 32 vjet. Policia e Cleveland është ende në ndjekje të 3 shqiptarëve të tjerë, Daniel Kadiu, Armando Marku dhe Sajmir Dodoveci, në lidhje me këtë rast, të cilët besohet se jetojnë jashtë shtetit. Detektivët po punojnë me agjencitë ndërkombëtare të krimit për t’i gjurmuar.
Të dyshuarit për raste të tjera përfshijnë Ron Domi, 21 vjeç, nga Luton, i cili kërkohet për përdhunimin dhe sulmin seksual të një vajze adoleshente nën 16 vjeç. Është e paqartë se ku ka shkuar, por detektivët kanë thënë se po ashtu edhe Domi ka lidhje me veriun e Londrës dhe Shqipërinë. Ata u kanë bërë thirrje pjesëtarëve të komunitetit shqiptar për informacione mbi vendndodhjen e tij.
TikTok ndaloi llogaritë e kontrabandistëve pasi u njoftua nga Daily Mail, por kur faqe të tilla hiqen ato zakonisht rishfaqen shpejt në një formë tjetër të ngjashme. Një zëdhënës i TikTok tha: “Ne kemi zero tolerancë për përmbajtjen që lehtëson kontrabandën dhe trafikimin e qenieve njerëzore. Videot dhe llogaritë në fjalë janë ndaluar dhe ne vazhdojmë të punojmë ngushtë me zbatuesit e ligjit në Mbretërinë e Bashkuar dhe partnerët për të gjetur dhe hequr përmbajtje të kësaj natyre.” ©Marrë nga Daily Mail,
