Ndau të dhëna personale të ndjeshme/ Norvegjia gjobë rekord ndaj Xandr

Autoriteti norvegjez i mbrojtjes së të dhënave ka gjobitur kompaninë e teknologjisë së reklamave, Xandr, në pronësi të Microsoft, me 92 milionë krona norvegjeze (9.6 milionë dollarë) për ndarjen e paligjshme të të dhënave personale të ndjeshme, njoftoi autoriteti të hënën.

Gjoba është më e larta e vendosur ndonjëherë nga Autoriteti Norvegjez i Mbrojtjes së të Dhënave, sipas transmetuesit publik NRK.

Kompania dyshohet se ka ndarë të dhëna personale me potencialisht mijëra kompani përmes ankandeve të reklamave në kohë reale të përdorura për të ofruar reklama të synuara.

“Mijëra përdorues në Norvegji janë ekspozuar ndaj ndarjes së paligjshme të informacionit të ndjeshëm”, tha në një deklaratë Drejtoresha e Autoritetit Norvegjez për Mbrojtjen e të Dhënave, Line Coll.

Coll i përshkroi shkeljet si “shumë serioze”, duke shtuar se ashpërsia e tyre justifikonte gjobën e konsiderueshme financiare.

Në një deklaratë të përcjellë për NRK, një zëdhënës i Microsoft tha se mbrojtja e privatësisë së përdoruesve ishte një përparësi kryesore për kompaninë.

Zëdhënësi vuri në dukje se hetimi dhe vendimi kishin të bënin me aktivitete që i paraprinë blerjes së Xandr nga Microsoft, duke shtuar se interpretimet dhe praktikat rregullatore kishin evoluar që atëherë.

Kompania tha se po e rishikonte vendimin dhe po shqyrtonte mundësitë e saj./ AA.