Kemi një lajm të keq për të gjithë ata që mezi presin të shijojnë mbrëmjet e verës në natyrë me një xhin dhe tonik freskues.
Shkencëtarët kanë zbuluar se xhini mund të na bëjë më tërheqës për mushkonjat dhe toniku përmban shumë pak kininë për t’u quajtur një armë efektive kundër insekteve bezdisëse.
“Pirja e alkoolit në përgjithësi na bën më tërheqës për mushkonjat”, tha profesori James Logan për British This Morning.
Fjalët e tij konfirmohen nga hulumtimi i publikuar në revistën e Shoqatës Amerikane të Kontrollit të Mushkonjave, sipas të cilit konsumimi i alkoolit tërheq “dukshëm” mushkonjat.
Duke vëzhguar 12 burra dhe një grua midis moshës 20 dhe 58 vjeç, studiuesit matën përmbajtjen e alkoolit në djersën e pjesëmarrësve që pinin 350 mililitra birrë. Ata vëzhguan gjithashtu prodhimin e djersës dhe temperaturën e lëkurës së vullnetarëve para dhe pas pijes alkoolike. Më shumë mushkonja u ulën mbi ata që pinin birrë.
“Studimi konfirmoi se njerëzit që pinë alkool duhet të jenë të kujdesshëm, sepse janë të ekspozuar ndaj një rreziku të shtuar të pickimit të mushkonjave, e për rrjedhojë edhe të sëmundjeve që transmetojnë këto insekte”, përfundojnë studiuesit.
Gjëja më e mirë që mund të bëni për të mbrojtur veten nga këta gjakpirës është të mbani një ilaç kundër mushkonjave dhe ta aplikoni sa herë që jeni jashtë. Dhe mos harroni ta rinovoni rregullisht, si krem kundër diellit.
