Aksident në bypass-in Mbrostar–Levan, përplasen betonierja dhe një automjet transporti, plagoset drejtuesi
Fier – Një aksident automobilistik është regjistruar pak minuta më parë në hyrje të bypass-it Mbrostar–Levan, pranë rrethrrotullimit të Spitalit Memorial Turk në Fier.
Sipas burimeve nga Drejtoria Vendore e Policisë Fier, në aksident janë përfshirë një betonierë dhe një automjet transporti, të cilat janë përplasur me njëra-tjetrën. Si pasojë e përplasjes, betonierja ka dalë nga rruga, ndërsa automjeti tjetër ka mbetur në vendngjarje.
Nga aksidenti ka mbetur i dëmtuar njëri prej drejtuesve të mjeteve, i cili ka pësuar frakturë në krah. Ai është transportuar me urgjencë në Spitalin Rajonal Fier, ku ka marrë ndihmën e parë mjekësore. Sipas informacionit paraprak, ndodhet jashtë rrezikut për jetën.
Menjëherë pas ngjarjes, në vendin e aksidentit ka mbërritur patrulla e Policisë, e cila ka ndërhyrë për menaxhimin e trafikut, pasi përplasja shkaktoi vështirësi në qarkullimin e automjeteve.
Ndërkohë, grupi hetimor po punon për të zbardhur rrethanat e aksidentit dhe për të përcaktuar shkakun e përplasjes.
