PD propozon 12 bashki në qarkun e Fierit, ja si do të ndaheshin njësitë administrative
Partia Demokratike ka bërë publik propozimin e saj për reformën administrativo-territoriale, duke kërkuar që numri i bashkive në qarkun e Fierit të dyfishohet, nga 6 në 12.
Sipas projektit të paraqitur nga opozita, krahas bashkive ekzistuese Fier, Patos, Roskovec, Lushnjë, Divjakë dhe Mallakastër, do të krijohen edhe gjashtë bashki të reja: Ardenicë, Krutje, Dushk, Fratar, Levan dhe Cakran.
Sipas propozimit, ndarja e njësive administrative do të ishte si më poshtë:
– Bashkia Fier: Fier, Qendër, Topojë, Mbrostar dhe Mënenas.
-Bashkia Patos: Patos, Zharrëz, Portëz dhe Ruzhdie.
-Bashkia Roskovec: Roskovec, Kuman, Kurjan dhe Strum.
-Bashkia Lushnjë: Lushnjë, Karbunarë, Hysgjokaj dhe Ballagat.
-Bashkia Divjakë: Divjakë, Rremas dhe Gradishtë.
-Bashkia Ardenicë: Kolonjë, Bubullimë dhe Libofshë.
-Bashkia Krutje: Fier-Shegan, Allkaj dhe Krutje.
-Bashkia Dushk: Dushk, Grabian, Golem dhe Tërbuf.
-Bashkia Mallakastër: Ballsh, Qendër, Greshicë dhe Aranitas.
-Bashkia Fratar: Fratar, Selishtë, Hekal dhe Kut.
-Bashkia Levan: Levan dhe Frakull.
-Bashkia Cakran: Cakran.
Një nga ndryshimet që bie më shumë në sy është kalimi i njësisë administrative Libofshë, e cila aktualisht është pjesë e Bashkisë Fier, në përbërje të Bashkisë së re të Ardenicës.
Mbetet për t’u parë nëse ky propozim do të gjejë mbështetjen e shumicës parlamentare dhe nëse palët do të arrijnë një konsensus për reformën e re administrativo-territoriale. Për momentin, propozimi i Partisë Demokratike është bërë publik dhe pritet të jetë pjesë e diskutimeve në procesin e reformës.
