“Mafia shqiptare depërton në portin e Vigos për të shkarkuar kοkainën”. Ky është titulli i një shkrimi të gazetës së njohur spanjolle “El Pais” për atë që po ndodh në betejën kundër narkοtrafikut në këtë vend. Në shkrimin që Lapsi.al sjell të plotë më poshtë thuhet se vitin e fundit në këtë port u sekuestruan gati 10 tonë drοgë duke bërë të qartë se grupet janë riaktivizuar me hapjen e një rruge të re të trafikut me Amerikën e Jugut.
Porti i Vigos është tashmë në një nga pikat kryesore të furnizuesve kryesorë të kokainës në Evropë. Sekuestrimi i ngarkesave të mëdha janë rritur në muajt e fundit, gjë që ka vënë në alarm Policinë Kombëtare (Udyco) dhe atë të Mbikëqyrjes Doganore për të përgjuar aktivitetin e grupeve ndërkombëtare, kryesisht me origjinë ballkanike, të cilët po përdorin këtë port të Galicias për të marrë mallin që pothuajse gjithmonë kamuflohet mes produkteve ushqimore. Vitin e kaluar në këtë port janë sekuestruar afro 10 tonë kokainë.
Ngarkesa e fundit që i kalonte 1000 kilogramët, u kap të mërkurën e kaluar. 6 shtetas shqiptarë dhe 3 belgë janë arrestuar dhe dërguar në burg pasi dyshohet se kanë grumbulluar dhe shpërndarë drogën, sipas hetimeve të policisë.
Nje nga shqiptarët e arrestuar
Grupi i trafikantëve vepronte në Vigo për mafiozët shqiptarë të integruar në atë që njihet si “Klani Ballkanik”, organizata më e fuqishme ndërkombëtare, përgjegjëse për më shumë se gjysmën e ngarkesave të kokainës që mbërrijnë në Evropë dhe që vazhdon të funksionojë si oktapod pavarësisht goditjeve ndaj tij nga policia.
Operacioni i fundit ishte në qershor. Këto mafie kokaine kanë rritur aktivitetin e tyre në portin e Vigos që kur në prill të vitit të kaluar u hap një rrugë e re tregtare me Amerikën e Jugut, e operuar nga kompania gjermane Hapag Lloyd, për transportin e frutave dhe peshkut të ngrirë.
Kjo linjë e re e anijeve, me lidhje të mëdha tregtare dhe ekonomike, është gjithashtu një mënyrë për t’u shfrytëzuar nga pronarët e biznesit të kokainës. Në fakt, itinerari javor i saj ndalon në porte si ato në Ekuador, që konsiderohen pikat kryesore të ngarkimit të drogës. Ndalesat e këtyre anijeve në Amerikën Latine janë Buenaventura (Kolumbi), Paita (Peru), Posorja dhe Guayaquil (Ekuador), Manzanillo (Panama), Puerto Limón (Kosta Rika) dhe Cartagena (Kolumbi). Përveç Vigos, linja lidhet me Malagën, Valencia, Barcelonën dhe 3 porte italiane që plotësojnë itinerarin.
Janë 8 anije që bëjnë itinerarin për të mbërritur në terminalin e kontejnerëve të Vigos. Ngarkesa e fundit e drogës u gjet në njërën prej tyre, në anijen “Cape Citius”. Bashkëpunimi mes policive lejoi që ngarkesa të monitorohej që nga nisja e saj nga Guayaquil (Ekuador) dhe të kontrolloheshin lëvizjet e 9 të arrestuarve, të cilët ndodheshin në një qendër tregtare në Vigo kur u bë bastisja, përpara se të arratiseshin.
Gjykata e Vigos ka urdhëruar burgosjen e përkohshme të të arrestuarve të akuzuar si anëtarë të një organizate kriminale, detyra kryesore e së cilës është marrja e ngarkesave që mbërrijnë në kontejnerë në portet e ndryshme spanjolle dhe evropiane. Asnjë prej tyre nuk i është përgjigjur pyetjeve të prokurorit dhe gjyqtari po e mban të fshehtë çështjen në pritje të arrestimeve të mëtejshme.
Anija “Cape Citius” me flamur qipriot ngarkoi ngarkesën legale në portin ekuadorian të Guayaquil, ku organizata futi në një nga kontejnerët e saj drogën duke përdorur “metodën e goditjes së verbër”. Ky është një sistem i zakonshëm që përdoret nga rrjetet e trafikut të drogës për transportin e lëndëve narkotike, në të cilin si dërguesit ashtu edhe marrësit e produkteve legale nuk janë në dijeni se anija ka brenda edhe diçka tjetër.
Agjentët e Policisë Kombëtare dhe të Mbikëqyrjes Doganore ishin një hap përpara trafikantëve të drogës. Zv.delegati i qeverisë në Pontevedra, Abel Losada, tregoi se hetimi po përpiqet të konfirmojë nëse kjo ngarkesë droge ka lidhje me disa nga konfiskimet e fundit të kokainës në Vigo. Në prag të Krishtlindjeve, Policia Kombëtare e Ekuadorit kapi një ngarkesë prej më shumë se 1200 kilogramësh kokainë në një kontenier që mbante kanaçe me peshk ton në portin e Guayaquil, i cili ishte gjithashtu i destinuar për në portin e Vigos. Gjatë një inspektimi para dërgesës, autoritetet gjetën në një kontejner 23 pako plastike të zeza që përmbanin 1264 pako kokainë.
Në fillim të dhjetorit, 500 kilogramë kokainë u gjetën edhe në një kontejner tjetër që po ashtu mbërriti në portin e Vigos në bordin e “Izmit Express”, një tjetër nga anijet që operon rrugën e re tregtare të Amerikës Latine. Kësaj sasie i shtuan edhe 23 kilogramë të tjera të gjetura nga vetë kapiteni në rezervuarin e anijes disa javë më parë, kur anija po vinte nga porti “Cartagena de Indias” në Kolumbi.
Depoja më e madhe e kapur në Galicia
Në fund të vitit 2023, mafia shqiptare që kontrollon trafikun ndërkombëtar të kokainës nga porti i Guayaquil (Ekuador) po përgatiste atë që do të ishte dërgesa më e madhe në historinë e trafikut të drogës në Galicia dhe e treta në Spanjë. Policia ishte njoftuar tashmë nga agjencia amerikane kundër drogës.
DEA dhe NCA britanike dhanë alarmin se një dërgesë droge po udhëtonte mes disa kontejnerëve me peshk të ngrirë me destinacion portin e Vigos dhe se më parë ishte ndalur në Algeciras. Kështu u aktivizua operacioni për sekuestrimin e 7.5 tonëve kokainë, nga shitja e së cilës do të fitoheshin rreth 500 milionë euro.
Policia priti që kontejnerët të dilnin nga porti dhe të transportoheshin në një magazinë të vendosur në një zonë industriale në Cambre (Coruña) në pronësi të biznesmenit Juan Bautista Suárez Pérez, 51 vjeç, pa të dhëna të mëparshme se ishte përfshirë në trafik droge. Kompania e tij lëviz rreth 300 kontejnerë me peshk të ngrirë në vit.
Megjithëse ngarkesa të panumërta duhani dhe droge kanë hyrë përmes portit të Vigos, ngarkesa e sekuestruar në Cambre ishte, për policinë, dëshmi e kapacitetit ekonomik të këtyre organizatave që operojnë për “Klanin Ballkanik” të gjithëfuqishëm, i cili kërkon lidhje të fuqishme portuale për të siguruar dërgesat e saj. Operacioni i policisë nisi kur biznesmeni i arrestuar po udhëtonte për në Meksikë dhe arrestimi i tij u bë në aeroportin e Madridit.
Mbrojtja e Suárez Pérez pretendon se nuk ka prova që e implikojnë atë në këtë dërgesë. Ai pretendon se ka qenë viktimë e mafias shqiptare që vepronte në Guayaquil, furnizues që kërkonin “një objektiv të lehtë” për shkak të vëllimit të peshkut të ngrirë që biznesmeni po lëvizte. Në mes të një rasti të ndërlikuar trafiku droge që përfshin një kompani të fuqishme të ushqimeve të ngrira, por që i përgjigjet një metode që lejon trafikantët e drogës të lëvizin qindra kilogramë kokainë, Suarez pohon se ka qenë “viktimë e mashtrimit”.
Kompania e Suárez Pérez ka funksionuar që nga viti 2008 dhe ishte një nga më aktivët në sektorin e peshkut të ngrirë, duke furnizuar me ton fabrikat kryesore të konservimit në zonën e saj. Kompania është e angazhuar në tregtinë ndërkombëtare me shumicë të peshkut dhe prodhimeve të detit, por edhe në blerjen dhe shitjen e pronave dhe ndërtesave rurale dhe urbane.
