Rruga e kokainës. Kush është shqiptari që e quajnë Pablo Escobari i ri.

“Escobari i ri është një shqiptar që u vetëdeklarua investitor grek”. Me këtë titull gazeta greke “Protothema” i ka kushtuar një shkrim të gjatë 44-vjeçarit shqiptar Dritan Rexhepi, i akuzuar se drejton një kartel kolosal shumëkombësh të trafikut të drogës. Në vitin 2011 ai u prezantua në Ekuador si një investitor grek me një palë dokumente të falsifikuara. Më herët kishte qenë vrasës me pagesë dhe ishte arratisur nga Shqipëria, Italia dhe Belgjika.

“Bandat shqiptare lëvizën në mënyrë më dinamike dhe efikase se shumica e konkurrentëve të tyre dhe arritën të merrnin frenat si lojtarët e rinj kryesorë në trafikun ndërkombëtar të kokainës, me opsione alternative për rrugët e transportit të ngarkesave. Dhe një nga pasardhësit e mundshëm të zotërve famëkeq të drogës të së kaluarës së afërt, si Pablo Escobar apo “El Chapo” mësohet se është shqiptar, 44-vjeçari Dritan Rexhepi.

Ndonëse i burgosur (aktualisht në Turqi dhe në pritje të ekstradimit në Shqipëri), Rexhepi, sipas një investigimi të gjerë të gazetës amerikane “The Washington Post” që hedh një vështrim gjithëpërfshirës të situatës aktuale në trafikun e drogës, shfaqet si bosi i ri, i madh, i fuqishëm i një narko-shumëkombëshe kolosale, një karteli që nuk njeh pushtet dhe kufij mes Kolumbisë dhe Meksikës. Në Netflix, ai mund të jetë një degë e mundshme e serialeve të tipit “Narcos” – shkruan Protothema që më pas bën edhe historinë e jetës së Rexhepit.

“Dritan Rexhepi e nisi nga Ekuadori ngjitjen e tij në krye të karteleve të drogës duke përdorur një nga identitetet e tij të rreme. Ai u prezantua si një biznesmen dhe investitor grek. Kjo ndodhi rreth vitit 2011, kur Rexhepi shkoi në Ekuador duke ndjekur një trend të kohës në botën e krimit shqiptar. Shqiptarët, të cilët ishin përfshirë në tregtinë e drogës dhe kishin krijuar një rrjet partnerësh në të gjithë Evropën, kishin parë me kohë që Ekuadori po shfaqej si një fuqi në rritje, si një qendër qendrore për trafikun e ngarkesave të kokainës, pothuajse në çdo drejtim përreth globit.

Për më tepër, dobësia e autoriteteve vendase përbënte një kuadër kushtesh jashtëzakonisht të favorshme për vendosjen e njerëzve me aspiratat e njerëzve si Dritan Rexhepi. Atje ai mund të blinte prona të paluajtshme pa u shqetësuar, të krijonte kompani me vitrina të ligjshme për të filluar veprimtarinë e tij të paligjshme dhe kriminale, e kështu me radhë.
Natyrisht, Rexhepi nuk emigroi në Ekuador me precedentë të pastër kriminalë nga jeta e tij e mëparshme. Në Shqipëri, si vrasës me pagesë, ai ishte përfshirë në vrasjen e një polici dhe një civili në vitin 1999. Një krim i dyfishtë për të cilin u arrestua në vitin 2006.

Megjithatë, ai u arratis menjëherë nga paraburgimi dhe filloi të endet në Ballkan dhe Itali si një i arratisur. Shqiptarët dhe italianët e kërkonin, por ai u arrestua përfundimisht në Holandë për vepra të trafikut të drogës. Rexhepi u ekstradua në Itali, ku u dënua me 13 vite burg, u arratis dhe u arrestua sërish, këtë herë në Spanjë, ku autoritetet e ekstraduan në Belgjikë. Pas një tjetër arratisjeje, i pakapshmi Dritan Rexhepi vendosi të shpërngulet në Ekuador, një vend që nuk prodhon vetë kokainë, por kufizohet me Kolumbinë dhe Perunë.

Shumë shpejt Rexhepi zuri rrënjë duke krijuar një organizatë të rregullt kriminale, duke aplikuar metodat e tyre, me një zinxhir biznesesh që trafikonin qindra ton kokainë dhe pastronin para të paligjshme. Megjithatë, Rexhepi kishte horizonte të hapura dhe vizione më të mëdha. Kjo është arsyeja pse ai u angazhua në një përpjekje sistematike për të depërtuar në shërbimet qeveritare të Ekuadorit, me ryshfete dhe korrupsion. Ai u bashkua me banditë vendas dhe madje përdori zëvendëskonsullin shqiptar në Ekuador si bashkëpunëtor të tij.

Megjithatë sërish Dritan Rexhepi u gjend pas hekurave. Në vitin 2014, ai u arrestua në qytetin më të madh të vendit, Guayaquil, dhe u dënua me 13 vjet burg për trafik droge. Por në realitet, dënimi për Rexhepin ishte si të ndryshonte ambientin e punës, pasi nga brenda qelisë ai iu përkushtua forcimit dhe zgjerimit të mëtejshëm të rrjetit të tij. Në vitin 2015, ai u përpoq të apelonte vendimin e shkallës së parë kundër tij, duke përdorur një shkelje të sistemit të drejtësisë. Ai pretendoi se emri i tij i vërtetë ishte Lulëzim Murataj dhe se ishte në burg gabimisht sepse policia dhe gjykata e ngatërruan me Dritan Rexhepin.

“Nuk ka asnjë provë më të vogël kundër meje, as edhe një fotografi të vetme që më lidh me krimin për të cilin jam akuzuar”, – tha në atë kohë Rexhepi. Dhe duke e ekzagjeruar me të njëjtin ton dramatik të të pafajshmit që po mbytet nga drejtësia, ai theksoi prerazi se “mëkati im i vetëm – le ta themi kështu – është se jam shtetas shqiptar. Dhe erdha në Ekuador sepse vendi reklamohet jashtë vendit për të tërhequr investime”.

Pavarësisht nga burgosja e Rexhepit në Ekuador, organizata e tij vazhdoi të përhapte tentakulat e saj në mbarë globin, duke krijuar stacione tranziti të drogës në Greqi, Rumani, Hungari, Itali, Spanjë, Holandë dhe Gjermani, Dubai dhe natyrisht në Shqipëri. Në të gjitha këto vende, në shtator 2020, organet e ndjekjes evropiane arrestuan 20 bashkëpunëtorë të Rexhepit, pas shumë muajsh monitorim të lëvizjeve të tyre. Përsëri, megjithatë, ai nuk dukej aspak i trembur.

Në gusht të vitit 2021, duke tërhequr fijet e duhura në prapaskenë, atij iu ndryshua dënimi në “arrest shtëpie” me një “byzylyk”, gjoja për arsye shëndetësore. Vetëm pak ditë më vonë i hoqën edhe byzylykun nga këmba pasi mendohej se Rexhepi nuk do të arratisej dhe do të përmbushte kushtin që i ishte vënë, që të paraqitej në komisariatin përkatës çdo 15 ditë. Menjëherë pasi kandidati presidencial ekuadorian Fernando Villasencio kritikoi ashpër vendimin e autoriteteve për lirimin e Rexhepit, ai u vra nga persona të panjohur.

Megjithatë, shqiptari u arrestua sërish në nëntor 2023, pas presioneve të forta nga jashtë. Agjencitë italiane dhe shqiptare kundër drogës kanë kërkuar që Ekuadori të ekstradojë Rexhepin. Por në vend që ai të çohej në gjykatë apo burg, Rexhepi u gjend në Turqi, duke jetuar në një rezidencë luksoze buzë detit në një periferi të Stambollit.

Ai kishte udhëtuar atje me një pasaportë kolumbiane me emrin Benjamin Omar Pérez García. Ishin agjentët italianë të policisë të luftës kundër drogës që e zbuluan dhe që njoftuan kolegët e tyre turq, të cilët kryen arrestimin e tij.

Lajmet se çfarë do të ndodhë më pas me Rexhepin janë të përziera, pasi qeveria turke thuhet se ka miratuar ekstradimin e tij në Shqipëri, por ai do ta gjejë një mënyrë për të qenë sërish i lirë. “Karteli shqiptar i kokainës” është në një trajektore rritjeje dhe “shefi i madh” nuk mund të humbasë kohën e tij.

Për më tepër, kërkesa për kokainë në Evropë dhe prodhimi në Amerikën e Jugut janë vazhdimisht në rritje. Në vitin 2022 janë prodhuar 2757 ton kokainë, duke shënuar një rritje prej 20% krahasuar me një vit më parë. Për sa i përket konsumit të kokainës, Evropa ka kaluar edhe SHBA-në, tradicionalisht tregu më i madh në botë. Këtë e tregojnë konfiskimet e ngarkesave të kokainës në portet evropiane, të cilat janë pesëfishuar nga 2011 në 2021.

Është pikërisht periudha kur Dritan Rexhepi ndërtoi narko-perandorinë e tij, duke vulosur “tullat” e kokainës me etiketën e tij të dashur “Kompania Bello” apo “Kompania e bukur”. ©Marrë me shkurtime nga Protothema.gr, përshtati në shqip LAPSI.al