Një tragjedi familjare ndodhi të hënën pasdite në Elefsina të Greqisë , kur një grua 71-vjeçare humbi jetën duke u përplasur nga makina e vajzës së saj ndërsa po parkonte. Sipas mediave greke, shoferja 44-vjeçare ishte kthyer në shtëpi me nënën dhe fëmijët e saj, pasi kishte shkuar më parë në shkollë për t’i marrë.
Ndërsa po përpiqej të parkonte automjetin e saj, 71-vjeçarja doli nga makina për t’i dhënë udhëzime. Mësohet se dera e pasagjerit mbeti e hapur dhe gjatë procesit të kthimit mbrapsht, shoferja aksidentalisht shkeli gazin. Mjeti lëvizi në mënyrë të pakontrollueshme, duke zvarritur gruan e moshuar dhe duke e bllokuar atë midis derës së hapur të makinës dhe një peme.
Ngjarja tragjike u zhvillua para syve të tmerruar të nipërve dhe mbesave të 71-vjeçarit, të cilët po qanin për gjyshen e tyre. Fqinjët që dëgjuan britmat e dëshpëruara nxituan në vendngjarje për të ofruar ndihmë, ndërsa vajza e 71-vjeçarit ishte në gjendje shoku.
“Fëmijët po qanin për gjyshen e tyre”, tha një banor i tronditur i zonës, ndërsa një tjetër banor raportoi se ata po qanin dhe po kërkonin ndihmë në të njëjtën kohë. Gruaja 71-vjeçare u transportua me ambulancën e EKAB në Spitalin Thriasio ku u shpall e vdekur. 44-vjeçarja u arrestua nga autoritetet me akuzën e vrasjes së paqëllimshme, ndërsa hetimi për aksidentin vijon.
