Eksperti i kriminalistikës, Ervin Karamuço, ka zbuluar ngritjen e zyrës së DEA-s në Tiranë.
Përmes një postimi në Facebook, ai i uron mirëseardhjen në Tiranë agjentëve të anti-drogës amerikane.
“DEA mirëseerdhët!!!!!! Ishte koha e duhur për të hapur zyrën në Tiranë. Athina po bëhej gjithnjë e më e largët për punët e ngutshme që diktojnë prezencën tuaj këtu….”, shkruan Karamuço në facebook.
Ky vendim i DEA-s për të zbarkuar në Tiranë, vjen në një kohë ku organizatat kriminale shqiptare kanë marrë një rol kyç në trafikun e kokainës nga vendet e origjinës të Amerikës Latine drejt Evropës.
Ardhja e agjentëve të anti-drogës amerikanë në Tiranë, vjen pas një zhvillimi të rëndësishëm që ndodhi pak kohë më parë, ku Drejtori i Përgjithshëm i Policisë së Shtetit Gledis Nano, gjatë vizitës në Washington takoi shefin e FBI-së, Christopher Wray.
Në një intervistë ekskluzive për Gazetën “Panorama.al”, zoti Nano zbuloi se takimet me drejtuesit e agjencive amerikane kishin si qëllim rritjen e bashkëpunimit për shkëmbim informacioni, por dhe hetime dhe operacione të përbashkëta në luftën kundër krimit të organizuar, korrupsionit dhe terrorizmit.
Sipas tij, Policia e Shtetit ka zhvilluar shumë operacione me FBI-në, DEA-n, me Zyrën e Sigurisë së Ambasadës Amerikane e me agjencitë të tjera ligjzbatuese amerikane.
Ambasada amerikane në Tiranë shpërndau gjithashtu pamjet nga takimi dhe një mesazh ku shkroi se vizita e Gledis Nanos “përforcoi më tej bashkëpunimin mes Policisë së Shtetit Shqiptar dhe Qeverisë së SHBA”.
