Të paktën dy persona u vranë nga të shtënat në dy lokale në Oslo. Policia e kryeqytetit norvegjez konfirmoi dy të vdekur dhe 21 të plagosur. Një nga lokalet ishte nje klub nate, i frekuentuar nga homoseksualët, veçanërisht në këto ditë kur zhvillohet parada e Oslos.
“Dukej si një skenë lufte, me shumë njerëz në tokë të lënduar nga të shtënat”, tha një dëshmitar për mediat norvegjeze.
“Vrasësi ishte shumë i vendosur, veçanërisht ku qëllonte”, shtoi një grua, shkruan CNN .
Autorit të të shtënave iu sekuestruan dy armë zjarri, pas arrestimit. I dyshuari është person i njohur për shërbimet e sigurisë në Norvegji.
Sipas policisë, ky akt është kryer vetëm nga një person. Policia norvegjeze tha se po e trajtonte ngjarjen si “akt terrorist”. Kryeministri i Norvegjisë, Jonas Gahr Stoere, e ka quajtur sulmin “të tmerrshëm dhe shokues ndaj personave të pafajshëm”.
Pas këtij akti, autoritetet anuluan Marshimin e Krenarisë në Oslo, një event i organizuar nga komuniteti LGBTI dhe i planifikuar për sot pasdite.
