Rrëfimi në “Daily Mail”: Jam një shqiptar baron drᴏge, policia s’do na mposhtë kurrë

Një baron drᴏge shqiptar ka rrëfyer në intervistë për “Daily Mail” arsyen pse ai beson se policia britanike nuk do t’i mposhtë kurrë bandat që kontrabandojnë kᴏkainë në Mbretërinë e Bashkuar. Gangsteri, i cili foli në kushte anonimiteti, tha se një praktikë e shpeshtë që bëjnë mafiozët shqiptarë ishte pengimi i policisë nga ndalimi i plotë i aktiviteteve të tyre kriminale në Mbretërinë e Bashkuar.

Që nga viti 1995, shqiptarët kanë qenë lojtarë të rëndësishëm në tregtinë e kokainës në Itali, Belgjikë, Holandë dhe Spanjë, duke pasur rrjete të mirë-organizuara furnizimi. Për të hyrë në tregun e Mbretërisë së Bashkuar në fund të vitit 2000, ata përdorën moton “shit lirë dhe shit më shumë”.

Një shqiptar në Londër, i cili kreu 17 vjet burg si pjesë e një grupi të madh kriminal të organizuar në tregtinë e kokainës, shpjegoi se një arrestim nuk do të thoshte domosdoshmërisht fundin e aktivitetit për atë qelizë të trafikut të kokainës. Që nga viti 2005, Agjencia Kombëtare e Krimit, e cila zëvendësoi Agjencinë e Krimit të Organizuar të Rëndë dhe Drejtoria e Krimit të Specializuar në Scotland Yard kanë arrestuar dhe dënuar me sukses qindra shqiptarë në tregtinë e kokainës.

Në fund të vitit të kaluar kishte pothuajse 1100 shqiptarë në burg, përfshirë krerët e frikshëm të mafies ballkanike që shpërndanin kokainë në rrugët e Britanisë. Përveç kontrollit të tregtisë së drogës, gangsterët shqiptarë që terrorizojnë Mbretërinë e Bashkuar janë dënuar gjithashtu për vrasje, krime seksuale, pastrim parash dhe kontrabandë njerëzish. Por sapo shkatërrohet një grup kriminal i organizuar shqiptar, një i ri duket se i zëvendëson ata.

Gangsteri i tha “Daily Mail” se kjo ishte për shkak të një praktike të quajtur “shitje e punës”. Ai tha se kur një anëtar i bandës arrestohej, nëse policia nuk arrinte të merrte telefonin e tij, bashkëpunëtorët e tij, e shisnin telefonin dhe kontaktet në të për deri në 100 000 £.

NCA ka paralajmëruar për vite me radhë për “kërcënimin e konsiderueshëm” që paraqesin bandat shqiptare, të njohura për profesionalizmin dhe disiplinën e tyre, si dhe taktikat e egra për të mbajtur larg konkurrencën. Bandat e pamëshirshme shqiptare kanë dominuar tregtinë britanike të drogës, duke negociuar drejtpërdrejt me kartelet kolumbiane dhe duke i goditur rivalët kriminalë duke përmbytur rrugët e Britanisë me kokainë të lirë.

Rrjedha e parave përsëri në Shqipëri është një shqetësim në rritje për NCA-në. Frika e saj është rritur aq shumë sa vitin e kaluar agjencia nënshkroi një marrëveshje me zyrën e kundër krimit të organizuar të Shqipërisë, SPAK me qëllim identifikimin e pasurive të shqiptarëve të dënuar në Mbretërinë e Bashkuar.

Në vitin 2010, vetëm 1.5% e shtetasve të huaj të burgosur në Angli dhe Uells ishin shqiptarë. Por deri në fund të vitit 2024, shqiptarët përbënin 10.6%, më shumë se çdo kombësi tjetër. Numri në rritje i shqiptarëve erdhi pjesërisht edhe për shkak të numrit të madh të atyre që kaluan kanalin, me një total prej 12 685 personash të ardhur në Britani me anije të vogla në vitin 2022. Ky fluks ka rënë që kur ministrat nënshkruan një marrëveshje transferimi të të burgosurve me qeverinë e Shqipërisë në vitin 2022.

Nën qeverinë e Rishi Sunak, 200 persona u deportuan në këmbim të 8 milionë paundëve për të modernizuar sistemin e tyre të burgjeve. Partia Laburiste është zotuar të deportojë më shpejt kriminelët e huaj, duke thënë se “nuk mund të jetë e drejtë” që taksapaguesit britanikë të paguajnë faturën. Mendohet se kushton rreth 40 000 paund në vit për të strehuar një të burgosur, duke sugjeruar se Mbretëria e Bashkuar shpenzon 44 milionë paund për mbajtjen në burg të kriminelëve shqiptarë.

Megjithatë, bosi shqiptar i drogës u mburr se si ai dhe gangsterët e tjerë arritën të dominonin tregun e kokainës. “Ne kishim pastërtinë më të lartë të kokainës për një gram të shitur në rrugë. Kjo i bëri përdoruesit ekzistues të merrnin drogën nga ne dhe të braktisnin shitësit ekzistues” – tha ai.

“Kjo e bëri organizatën ku isha unë, të bëhej furnizuesi kryesor i kokainës për Portsmouth dhe Bournemouth përpara se të shitej në rrugë. Në vitin 2009 – 2010 ne e ulëm çmimin për një kilogram kokainë nga 35,000 £ në 30,000 £. Ky ishte një ndryshim rrënjësor për tregun në atë kohë” – tha ai.

Vitin e kaluar NCA tha se tregtia e drogës e lidhur me shqiptarët ishte aktive në të gjithë vendin në qytete, qyteza dhe madje edhe në zona rurale. Agjencia tha se bandat shqiptare po kontrabandojnë “qindra miliona” sterlina nga Mbretëria e Bashkuar çdo vit.

“Objektivi i tyre kryesor kur fitojnë para është t’i nxjerrin ato nga vendi sa më shpejt të jetë e mundur” – u shpreh Steve Brocklesby, Menaxher i Inteligjencës nga NCA.

“Ata i kontrabandojnë ato nga Mbretëria e Bashkuar në Shqipëri në çfarëdo forme që të vijë. Vlerësimet janë se qindra miliona paund sterlina britanike po largohen nga Mbretëria e Bashkuar dhe përfundojnë në Shqipëri, ku më pas legjitimohen, ose nëpërmjet sistemit bankar ose duke paguar për punime ndërtimi.

Ne gjithashtu e dimë se shqiptarët do të transferojnë paratë e Mbretërisë së Bashkuar në zyrat e këmbimit të Mbretërisë së Bashkuar dhe Evropës, do t’i këmbejnë në euro dhe do t’i dërgojnë ato në Shqipëri. Mund të presim të shohim një rritje në përdorimin e kriptomonedhave dhe investimeve të tjera në Mbretërinë e Bashkuar, si dhe investime të drejtpërdrejta në Mbretërinë e Bashkuar në vitet e ardhshme” – tha ai. NCA është kontaktuar për të bërë një koment. ©Daily Mai