Vin Diesel ka surprizuar fansat duke hedhur pas krahëve konfliktin shumëvjeçar me Dwayne “The Rock” Johnson dhe duke e përgëzuar publikisht për filmin e tij të ri, The Smashing Machine.
Në një postim të bërë të martën, më 25 nëntor, Diesel ndau në Instagram një foto të tij me Johnson , teksa lavdëroi performancën e aktorit si legjenda e UFC-së, Mark Kerr — me të cilin Diesel ka edhe miqësi personale.
“Nuk ka dhuratë më të madhe se marrëdhëniet e krijuara përgjatë rrugës,” shkroi ai, përpara se të ndalej te filmi i Johnson. Diesel tregoi se është bërë mik me Mark Kerr-in që në vitet kur sapo ishte shpërngulur në Kaliforni, dhe se Kerr e ka ndihmuar në stërvitje për filmin e tij të vitit 2002, xXx.
Ai e përshkroi luftëtarin si “një nga njerëzit më të ngrohtë dhe më të sjellshëm që mund të takosh.”
Duke folur për Johnson, ai shtoi:
“Le të vlerësojmë edhe Dwayne. Shumë njerëz nuk e kuptojnë çfarë kërkohet për të mbajtur një imazh global çdo ditë.”
Marrëdhënia mes dy aktorëve ka qenë e trazuar që nga viti 2016, kur Johnson publikoi një mesazh të gjatë në Instagram duke kritikuar disa kolegë të tij të Fast & Furious, pa përmendur emra.
Në vitet pasuese, Johnson deklaroi se ai dhe Diesel janë “dy njerëz filozofikisht shumë të ndryshëm” dhe se nuk do të kthehej më në film. Megjithatë, aktori bëri një cameo në Fast X në vitin 2023 dhe në verë të po atij viti njoftoi se konfliktet mes tyre kishin “mbetur pas”. Tani duket se paqja mes tyre është e plotë.
Në postimin e tij të fundit, Diesel e përshkroi bashkëpunimin e tyre si:
“Një nga dyshet më dinamike në kinematografi — dy personalitete të forta që shtynë njëri-tjetrin dhe krijuan diçka të paharrueshme.”
Ai shtoi se Johnson ka bërë një interpretim të jashtëzakonshëm në rolin e Kerr-it:
“Dwayne na ktheu pas në kohë dhe shkëlqeu duke e bërë këtë. Jam krenar për të.”
