Gazetari investigativ italian: Mafia shqiptare ka krijuar aleanca me klanet siciliane

Këtë të enjte në Palermo, në Asamblenë Rajonale të Sicilisë, u mbajt një seancë dëgjimore e ndjeshme nga Komisioni Parlamentar Anti-Mafia, i udhëhequr nga kryetari Antonello Cracolici. Folësi kryesor ishte gazetari investigativ Giuseppe Bascietto, i cili u thirr për të raportuar mbi zhvillimet e fundit të krimit të organizuar në Sicili. Një pjesë e seancës ishte e klasifikuar, një shenjë e rëndësisë dhe ndjeshmërisë së temave të diskutuara.

Basciaetto shpjegoi se takimi, i cili zgjati gati 2 orë, u përqendrua kryesisht në aktivitetet e krimit të organizuar shqiptar dhe pasojat e tij në Siçili.

“Në thelb diskutuam krimin e organizuar shqiptar, aleancat e tij me figurat dhe klanet lokale” – tha ai duke renditur më pas edhe klanet mafioze që janë identifikuar si aktive në Sicili.

Sipas Bascietto, situata aktuale është shumë shqetësuese sepse “këto organizata të reja po e ndajnë Sicilinë në dysh, duke vepruar pa pëlqimin e Cosa Nostra të Palermos dhe duke bërë ç’të duan”.

“Kjo po krijon një sërë problemesh dhe tensionesh në rajon” – tha gazetari që theksoi se si aftësia e shqiptarëve për të krijuar aleanca ka qenë thelbësore për depërtimin e tyre në Sicilinë juglindore, historikisht e konsideruar si “barku i butë” i rajonit, një zonë që gjatë viteve të klanit “Stidda” i kishte shpallur luftë Cosa Nostra-s së Palermos.

Bascietto shpjegoi se si, sipas mendimit të tij, Sicilia juglindore po transformohet në “portin e ri të Gioia Tauro”, duke u bërë një qendër për trafikun ndërkombëtar të drogës. Drogat mbërrijnë, shpërndahen në të gjithë zonën dhe më pas maskohen në fikëse zjarri, speca ose funde të modifikuara të rreme kamionësh, për t’u shpërndarë më pas në të gjithë Evropën.

Deklaratat e tij kanë tërhequr vëmendjen e Komisionit, duke theksuar kompleksitetin dhe rrezikun e aleancave të reja kriminale që po ripërcaktojnë peizazhin mafioz sicilian.

“Vetëm hetimet e ardhshme do të jenë në gjendje të sqarojnë masën në të cilën këto organizata po veprojnë pa pëlqimin e mafieve të vjetra”, – theksoi gazetari, duke i nxitur të gjithë të qëndrojnë vigjilentë dhe të promovojnë bashkëpunim gjithnjë e më të ngushtë midis forcave të zbatimit të ligjit dhe institucioneve.