Punonjësit e stresuar jo vetëm përbëjnë një rrezik për ruajtjen e punës, por gjithashtu mund të ulin potencialisht produktivitetin.
Por sa të stresuar janë shqiptarët në punë? Sipas një raporti të Gallup për vitin 2025, 39% e shqiptarëve vuajnë nga stresi i punës.
Ne renditemi të tretë në Ballkan për nga niveli i stresit, pasi në vend të parë janë grekët me 61%, ndërsa më pas vijnë sllovakët me 40%.
32% e punonjësve në Kosovë dhe Bullgari shprehen të shqetësuar, ndërsa Serbia, Kroacia, Bosnje Hercegovina raportojnë 31%. Niveli më i ulët i stresit në rajon e shënon Mali i Zi me 25%.
Niveli i stresit në Shqipëri, 2025
Sipas Gallup, 39% e shqiptarëve shprehen se ndihen çdo ditë të stresuar për shkak të punës. Por stresi nuk është emocioni i vetëm që përjetohet në ambientin e punës.
Të paktën 14% e shqiptarëve ndihen çdo ditë të frustruar e nervozë në punë. Sakaq, 17% e shqiptarëve ndihen çdo ditë të mërzitur në punë.
Të paktën 63% shprehën se është periudhë e mirë për të gjetur punë tjetër.
Cilët punëtorë evropianë e menaxhojnë më mirë stresin?
Kur bëhet fjalë për stresin, evropianët jugorë shfaqin tendencë më të lartë, duke përfshirë Greqinë (61%), Maltën (57%), Qipron (56%), Italinë (51%) dhe Spanjën (47%).
Nga ana tjetër, danezët (19%), polakët (22%) dhe lituanezët (23%) duket se ndiejnë më pak presion në vendet e tyre të punës.
Gallup shpjegon se profili i punonjësit më të stresuar është ai i shefit nën 35 vjeç dhe ai i atyre që punojnë në kushte pune hibride.
Nivelet më të ulëta të angazhimit të punonjësve janë regjistruar në Kroaci (7%), Francë (8%), Zvicër (8%), Luksemburg (9%) dhe Austri (9%).
Nivelet më të larta të angazhimit të punonjësve janë gjetur në Shqipëri (32%), Rumani (31%), Suedi (25%) dhe Maltë (25%). Punonjësit më të angazhuar kanë tendencë të jenë ata nën moshën 35 vjeç, të cilët nuk mbajnë pozicione drejtuese dhe punojnë ekskluzivisht në afërsi.
15% e të anketuarve thanë se janë “të shkëputur në mënyrë aktive”, që do të thotë se distancohen me vetëdije nga puna, ekipi dhe punëdhënësi i tyre. Ekspertët e quajnë këtë fenomen “dorëheqje e heshtur”.
Sakaq, lista e punëtorëve më të lumtur kryesohet nga finlandezët (81%), islandezët (78%) dhe danezët (78%).
Pavarësisht sfidave të punësimit që vijnë nga inteligjenca artificiale dhe paqëndrueshmëria gjeopolitike globale, punëtorët evropianë janë jashtëzakonisht optimistë, me 57% që thonë se situata aktuale është e mirë për të gjetur një punë, më e lartë se mesatarja globale prej 52%.
Holandezët janë më optimistët (86%) dhe sllovakët janë më pak optimistët me 32%.
