18 thënie legjendare për Ronaldon:
Ronaldo Nazário shpesh nuk përmendet aq sa duhet në debatet për futbollistin më të mirë të të gjitha kohërave, por për ata që kanë luajtur me të apo kundër tij, madhështia e brazilianit nuk vihet në diskutim.
I mbiquajtur “O Fenômeno”, Ronaldo shpërtheu që në moshë shumë të re dhe u kthye në një nga sulmuesit më të frikshëm që ka njohur futbolli. Ai shënoi mbi 350 gola në nivel klubesh dhe realizoi 62 herë në vetëm 98 paraqitje me kombëtaren e Brazilit.
Dëmtimet e rënda ndikuan ndjeshëm në karrierën e tij, por nuk e penguan të linte një trashëgimi të jashtëzakonshme. Disa prej emrave më të mëdhenj të futbollit botëror kanë përdorur fjalë të rralla për të përshkruar talentin e tij.
Kaká: “Lojtari më i mirë me të cilin kam luajtur? Ronaldo. E kam parë ‘Fenomenin’ të bëjë gjëra që askush tjetër nuk i ka bërë. Shpejtësia e mendimit dhe mënyra se si i realizonte aksionet ishin perfekte. Ishte vërtet një fenomen.”
Alessandro Nesta: “Ronaldo është sulmuesi më i vështirë me të cilin jam përballur. Ishte i pamundur për t’u ndalur. Finalja e Kupës UEFA në vitin 1998 kundër Interit ishte një nga eksperiencat më të vështira të karrierës sime. E kam parë atë ndeshje shumë herë për të kuptuar çfarë bëra gabim, por Ronaldo ishte thjesht i pandalshëm.”
Zinedine Zidane: “Nuk do ta harroj kurrë finalen e Kupës UEFA të vitit 1998 kundër Lazios dhe atë lëvizje ndaj Nestës. Kishte talent të lindur, si Maradona. Nuk kishte sistem apo taktikë që mund ta ndalte. Ishte jashtëzakonisht i shpejtë edhe kur kishte topin në këmbë.”
Zlatan Ibrahimović: “Për mua Ronaldo është më i madhi. Ishte në nivelin e Pelés. Nuk kishte askënd si ai. Askush nuk ka ndikuar te futbolli dhe te lojtarët e brezave të ardhshëm sa Ronaldo. Kisha fotografitë e tij në dhomën time. Ronaldo ishte idhulli.”
Ronaldinho: “Ai ishte idhulli im dhe më pas përfundova duke luajtur dhe duke fituar një Kupë Bote me të. Është sulmuesi më i kompletuar që ka ekzistuar dhe që do të ekzistojë ndonjëherë. Është pothuajse e pabesueshme që nuk e fitoi kurrë Champions League.”
Lionel Messi: “Ronaldo ishte heroi im. Ishte sulmuesi më i mirë që kam parë ndonjëherë. Ishte aq i shpejtë sa mund të krijonte një gol nga asgjëja dhe e godiste topin më mirë se kushdo.”
Luis Enrique: “E kisha parë te PSV dhe mendova: ‘Wow’. Pastaj erdhi te Barcelona. Është lojtari më spektakolar që kam parë. Bënte gjëra që nuk i kisha parë kurrë më parë. Ishte i fortë, një bishë, dhe në atë kohë ishte ende shumë i ri.”
Sir Bobby Robson: “Ronaldo ishte i jashtëzakonshëm. E mora nga PSV dhe për një vit te Barcelona ishte nga një botë tjetër. Ishte si një zot në fushë. Kishte fuqi, teknikë dhe aftësi për të kaluar çdo kundërshtar.”
Youri Djorkaeff: “Ronaldo ishte fenomenal. Ishte një nivel mbi të tjerët. Kujtoj golin ndaj Lazios, kur mashtroi portierin pa e prekur fare topin. Ishte e pabesueshme, por në stërvitje bënte gjëra të tilla çdo ditë.”
Miroslav Klose: “Kam luajtur në Itali dhe të gjithë ata me të cilët kam folur më kanë thënë se Ronaldo ishte futbollisti më i mirë që ka luajtur ndonjëherë në Itali. Për mua, ai ishte futbollisti më i kompletuar.”
Zico: “Lëvizja e tij pa top ishte e jashtëzakonshme. Nuk kam parë kurrë dikë që të pozicionohej kaq mirë. Do të doja të kisha luajtur me të. Jam i bindur se do të kishte shënuar 2000 gola, sepse do t’ia jepja topin çdo herë.”
Samuel Eto’o: “Ai ka bërë gjëra që asnjë futbollist tjetër nuk ka mundur t’i bëjë.”
Thierry Henry: “Ronaldo bënte gjëra që askush nuk i kishte parë më parë. Së bashku me Romarion dhe George Weah, ai ndryshoi mënyrën se si luhej roli i qendërsulmuesit. Dilte nga zona, merrte topin në mesfushë, shkonte në krah dhe çorientonte mbrojtësit me shpejtësinë dhe driblimet e tij.”
David Beckham kujtoi paraqitjen e Ronaldos në “Old Trafford” me Real Madridin, kur braziliani mori një ovacion nga tifozët e Manchester United: “Ronaldo na shkatërroi. Publiku u ngrit në këmbë dhe i dha një duartrokitje që zakonisht i rezervohej një lojtari të United. Tifozët e kuptuan se kishin pasur privilegjin të shihnin Ronaldon të luante.”
Ruud van Nistelrooy: “Ronaldo braziliani ishte futbollisti më i mirë me të cilin kam luajtur. Gjërat që për mua konsideroheshin të jashtëzakonshme, për të ishin pothuajse normale. Talenti i tij natyral ishte shumë përtej gjithçkaje që kam parë.”
Jorge Valdano: “Nëse Romario ishte eleganca, Ronaldo ishte shpërthimi. Nëse habitati i Romarios ishte zona e penalltisë, Ronaldo kishte nevojë për gjysmën e fushës. Loja e tij dukej sikur i përkiste së ardhmes.”
Gianluigi Buffon: “Futbollisti im i preferuar brazilian është Ronaldo. Kam pasur fatin të luaj kundër tij shumë herë dhe edhe përpara dëmtimeve të rënda. Ishte i jashtëzakonshëm, sensacional, pothuajse si një alien për gjërat që bënte në fushë. Fakti që një lojtar si ai nuk kujtohet si më i miri i të gjitha kohërave është, sipas meje, një padrejtësi e madhe.”
Clarence Seedorf e përmblodhi gjithçka në vetëm pak fjalë: “Lojtari më i mirë që kam parë gjatë karrierës sime.”
Ronaldo Nazário e fitoi dy herë Topin e Artë dhe dy herë Kupën e Botës me Brazilin, ndërsa kulmi individual në një Botëror erdhi në vitin 2002, kur udhëhoqi “Seleção”-n drejt titullit dhe përfundoi si golashënuesi më i mirë i turneut.
Edhe pse dëmtimet e gjurit i morën një pjesë të konsiderueshme të karrierës, dëshmitë e Messit, Zidane, Ronaldinhos, Ibrahimović, Buffonit, Nestës dhe shumë legjendave të tjera tregojnë përmasat e jashtëzakonshme të “O Fenômeno”.
SKEDA E LOJTARIT
Emri i plotë: Ronaldo Luís Nazário de Lima
Datëlindja: 18 shtator 1976
Vendlindja: Rio de Janeiro, Brazil
Kombësia: Braziliane
Pozicioni: Qendërsulmues
Këmba: E djathtë
Gjatësia: 183 cm
Pesha: rreth 90 kg
Kombëtarja: Brazil
Ndeshje me Brazilin: 98
Gola me Brazilin: 62
Topi i Artë: 2 herë
Kupa e Botës: 2 herë
Klube kryesore: Cruzeiro, PSV Eindhoven, Barcelona, Inter, Real Madrid, Milan, Corinthians
