Berisha – Ramës nga New Jersey: Po shpopullon vendin, ka bllokuar drejtësinë
Kreu i Partisë Demokratike, Sali Berisha, ka sulmuar ashpër kryeministrin Edi Rama gjatë një takimi me shqiptarët në New Jersey. Berisha e akuzoi qeverinë për rritjen e kostos së jetesës dhe për largimin masiv të shqiptarëve nga vendi. Sipas tij, çmimet po rriten ndjeshëm, ndërsa qiratë kanë arritur nivele të krahasueshme me pagën mesatare.
Ai e cilësoi qeverisjen aktuale si një “mostër hibride midis ekstremit të majtë dhe karteleve të drogës”, duke pretenduar se Rama po shpopullon Shqipërinë “me ritme apokaliptike”. Berisha u ndal edhe te hetimet ndaj ish-zëvendëskryeministres Belinda Balluku. Ai akuzoi mazhorancën se ka penguar drejtësinë duke mos votuar heqjen e imunitetit të saj pas kërkesës së SPAK.
Sipas kreut të PD-së, Rama ka përqendruar pushtetin dhe ka zbehur ndarjen mes partisë dhe shtetit. Ai pretendoi gjithashtu se mazhoranca po përdor numrat në Kuvend për të mbrojtur zyrtarë të lartë nga drejtësia.
