E qëlluan teksa ishte me biçikletë. Shqiptari Ilir Kadiu ka rënë pre e plumbave këtë të diel në Acerra, në një zonë ende të paspecifikuar të saj. Mediat italiane shkruajnë se rindërtimi i ngjarjes është ende në vijim. 40-vjeçari shqiptari mbërriti në mes të natës së kaluar në urgjencën e klinikës Villa dei Fiori, në komunën e provincës veriore të Napolit. Hetimet u janë besuar karabinierëve të stacionit të Acerrës. Sipas të njëjtave burime, i plagosuri ka qenë i arrestuar më parë me akuzën se ishte pjesë e një bande hajdutësh të shtëpive.
40-vjeçari, banues në zonë ka mbërritur në klinikë pak para orës 3 të mëngjesit të së dielës, me plagë me armë zjarri në këmbë. Ai iu nënshtrua ekzaminimeve të nevojshme dhe u përjashtuan pasojat e rënda. Plumbat nuk kishin dëmtuar arteriet dhe mjekët përjashtojnë rrezikun për jetën. Pas stabilizimit në Acerra ai u transferua në spitalin Cardarelli në Napoli.
Karabinierët po punojnë për rindërtimin e ngjarjes duke nisur nga vendi i plagosjes. Vetë viktima thotë se nuk ishte në gjendje të tregonte me saktësi vendndodhjen e të shtënave. Ai është shprehur se ishte goditur teksa ishte duke lëvizur me biçikletë pa dhënë informacione të mëtejshme për autorët. Hetimet po vijojnë edhe për jetën private dhe njohjet e tij. Versioni i dhënë nga 40-vjeçari mbetet për momentin në shqyrtim nga hetuesit.
Në gusht të 2018-ës, Kadiu u arrestua pas një ndjekjeje në lagjen Poltu Quadu në Sardenjë. 36-vjeçari i atëhershëm, me një histori të krimeve kundër pronës, marrjes së mallrave të vjedhura, shkeljes së ligjit, rezistencës dhe dhunës ndaj një zyrtari publik, besohej se ishte anëtar i një bande që për 2 vjet, kishte grabitur apartamente dhe vila të shumta në zonën bregdetare.
