Kancelari gjerman Olaf Scholz dhe presidenti i Francës Emmanuel Macron kanë publikuar një artikull të përbashkët në Financial Times, duke thënë se Bashkimi Europian duhet të bëjë përpjekje dramatike për të përmirësuar konkurrencën ose rrezikon mënyrën e vet të jetesës.
Pas disa javësh, europianët do të përcaktojnë axhendën e mandatit të ardhshëm në Bashkimin Europian. Duke parë sfidat e pesë viteve të fundit – si pandemia, lufta e vazhdueshme e Rusisë kundër Ukrainës apo ndryshimet gjeopolitike në rritje – një gjë është e qartë: Europa po përjeton pikërisht ato që tha kancelari gjerman, Olaf Scholz, në 27 shkurt të vitit 2022, fjalim që mori emrin “Zeitenëende” apo “pika e kthesës”. Ne nuk mund të marrim si të mirëqena themelet mbi të cilat kemi ndërtuar mënyrën tonë europiane të të jetuarit dhe rolin tonë në botë. Europa jonë është e vdekshme dhe ne duhet të përballemi me sfidën.
Forcimi i konkurrencës së Europës në botë dhe rritja e qëndrueshmërisë, duke e bërë marrëveshjen e gjelbër dhe tranzicionin dixhital një sukses, është në qendër të përgjigjes ndaj këtyre sfidave. Për këtë qëllim, Franca dhe Gjermania po propozojnë një shtysë për konkurrencën, gjatë mandatit të ardhshëm të BE-së.
Europa duhet të lulëzojë si një lider i fortë industrial dhe teknologjik i klasit botëror, duke zbatuar ambiciet për ta bërë BE-në kontinentin e parë neutral ndaj klimës. Ne mund të shfrytëzojmë potencialin e tranzicionit të gjelbër dhe dixhital për zhvillimin e tregjeve, industrive dhe punëve të mira të së ardhmes. Për të përmbushur këto ambicie të përbashkëta, Gjermania dhe Franca janë të bindura se BE-ja ka nevojë për më shumë risi, më shumë treg të përbashkët, më shumë investime, më shumë kushte për lojë të barabartë dhe më pak burokraci.
Në një deklaratë të përbashkët Macron dhe Scholz shkruajnë: “Së bashku, ne do të avokojmë për të forcuar sovranitetin e BE-së dhe për të reduktuar varësitë kritike, duke u mbështetur në zbatimin e suksesshëm të axhendës së zhvilluar që nga samiti i Versajës në mars 2022. Me një politikë industriale ambicioze, ne mund të mundësojmë zhvillimin dhe përhapjen e teknologjive kryesore të së nesërmes, si AI, teknologjitë kuantike, hapësira, 5G/6G, bioteknologjitë, teknologjitë me zero emetime, lëvizshmërinë dhe kimikatet. Ne duhet të përdorim plotësisht dhe të përshpejtojmë ndjeshëm instrumentet ekzistuese të BE-së, nga projektet e rëndësishme me interes të përbashkët europian deri te roli i prokurimit publik, duke marrë parasysh një qasje më strategjike në sektorët përkatës dhe për të modernizuar rregullat tona të konkurrencës në funksion të konkurrencës globale”.
Emmanuel Macron mbërriti në Gjermani të dielën më 26 maj për një vizitë shtetërore të ndjekur nga Këshilli i Ministrave Franko-Gjerman, një udhëtim i krijuar për të demonstruar unitetin midis dy vendeve, dy javë përpara zgjedhjeve europiane.
Macron u prit fillimisht nga presidenti gjerman Frank-Ëalter Steinmeier dhe mori nderime ushtarake në pallatin presidencial, Schloss Bellevue. Udhëtimi i Presidentit francez në Berlin, Dresden dhe Münster ishte vizita e parë shtetërore e një lideri francez në Gjermani, që nga ajo e Zhak Shirak në vitin 2000. Kjo është një mundësi për të vlerësuar marrëdhëniet midis dy fuqive të mëdha ekonomike të Europës, në një kohë kur kontinenti po përballet me sfidat e ndryshimeve klimatike, luftën në Ukrainë dhe rizgjedhjen e mundshme të Donald Trump në Shtëpinë e Bardhë në zgjedhjet e nëntorit.
Që kur kancelari gjerman Olaf Scholz erdhi në pushtet në vitin 2021, Parisi dhe Berlini janë përplasur hapur për çështje që variojnë nga mbrojtja tek energjia bërthamore. Megjithatë, kohët e fundit janë arritur disa marrëveshje, veçanërisht për subvencionet e tregut të energjisë elektrike.
“Ne bëjmë thirrje për forcimin e aftësive teknologjike të BE-së duke promovuar kërkimin dhe inovacionin më të fundit dhe infrastrukturat e nevojshme, duke përfshirë ato në lidhje me inteligjencën artificiale dhe shëndetin”, thuhet në deklaratën e përbashkët.
Një nga pikat më të forta konkurruese të Europës është tregu i vetëm, i cili u lejon bizneseve të zhvillojnë produkte dhe shërbime inovative, të rriten dhe të konkurrojnë, duke siguruar njëkohësisht standarde të larta. Ne duhet të korrim përfitimet e tij të plota me një treg të vetëm të modernizuar, duke reduktuar fragmentimin dhe barrierat, duke nxitur ndërlidhjen, duke rritur aftësitë dhe duke promovuar lëvizshmërinë dhe konvergjencën.
Gjithashtu, dy liderët kanë bërë thirrje për një axhendë ambicioze për reduktimin e burokracisë për të ofruar procedura administrative më të thjeshta dhe më të shpejta dhe për të ulur barrën burokratike për bizneset e të gjitha madhësive. Së fundmi, Komisioni Europian ka ndërmarrë një nismë për të reduktuar raportimet për kompanitë me 25%. Ky premtim duhet të zbatohet me legjislacion specifik. Parimet e subvencioneve dhe proporcionalitetit kanë gjithashtu nevojë për një fillim të ri.
Ne do të mbështesim së bashku një politikë tregtare europiane ambicioze, të fuqishme, të hapur dhe të qëndrueshme, që lejon marrëveshje të drejtë të tregtisë dhe promovon interesat e BE-së, krijon mundësi reciproke aksesi në treg dhe një fushë të qartë dhe të barabartë loje me partnerët tregtarë. BE-ja duhet të mbetet një avokat për sistemin tregtar shumëpalësh të bazuar në rregulla dhe të veprojë për konkurrencë të ndershme.
Macron dhe Scholz angazhohen gjithashtu të dekarbonizojnë plotësisht sistemet e energjisë. “Ne do ta arrijmë këtë në një treg plotësisht të integruar dhe të ndërlidhur duke respektuar zgjedhjet kombëtare për miksimin e burimeve të energjisë. Kjo është mënyra europiane, e cila do të rrisë qëndrueshmërinë, sigurinë e furnizimit dhe do të hapë rrugën për më shumë sovranitet.
Përpjekjet tona për investime kolektive, private dhe publike, duhet të përputhen me ambiciet tona. Ne duhet të zhbllokojmë potencialin e plotë të tregjeve të kapitalit. Shumë kompani që kërkojnë të financojnë rritjen e tyre kthehen në anën tjetër të Atlantikut. Shumë kursime europiane po investohen jashtë dhe jo në “start up”-et më premtuese të Europës. Për të mobilizuar investimet e nevojshme, ne duhet të marrim seriozisht një treg financiar europian të integruar me sistemin bankar dhe me tregjet e kapitalit, duke adresuar fragmentimin dhe duke siguruar konkurrencën globale të sektorit financiar europian.
Duke vepruar kështu, do të na duhet të rifillojmë tregun europian të letrave me vlerë, të përmirësojmë konvergjencën dhe efikasitetin e mbikëqyrjes së tregjeve të kapitalit në të gjithë BE-në, të harmonizojmë aspektet përkatëse të kornizave të falimentimit të korporatave dhe ligjit tatimor, të thjeshtojmë kuadrin rregullator dhe të zhvillojmë një kornizë të thjeshtë dhe efektive. Investimet private dhe publike duhet të ecin paralelisht. Ne duhet ta bëjmë buxhetin e BE-së të përshtatshëm për të ardhmen dhe të prioritarizojmë më tej investimet në shpenzimet transformuese dhe të mirat publike, ndërsa punojmë për futjen e burimeve të reja, siç është rënë dakord në vitin 2020.
Së bashku, ne bëjmë thirrje për ta vënë këtë axhendë në zemër të mandatit të ardhshëm. BE-ja është e ardhmja jonë e përbashkët.
Lidion Kulla / SCAN
