Fier/Automjeti Volkswagen përfundon në kanalin vaditës në Kallm, dyshohet se ka dalë nga rruga gjatë natës

Një automjet tip Volkswagen ka përfunduar brenda një kanali vaditës në zonën e Kallmit, në një rrugë rurale që të çon drejt inceneratorit të Fierit.
Sipas burimeve nga Drejtoria Vendore e Policisë Fier dhe informacioneve nga vendngjarja, automjeti dyshohet se ka dalë nga rruga pasi ka kaluar një kthesë, duke përfunduar në kanalin e mbushur me ujë.
Fatmirësisht, nga ky incident nuk raportohet për persona të lënduar apo viktima. Sipas të dhënave paraprake, drejtuesi i automjetit dhe personat e tjerë që mund të kenë qenë në të kanë arritur të dalin pa dëmtime. Nga aksidenti janë shkaktuar vetëm dëme materiale.
Banorët e zonës dhe burime pranë vendngjarjes bëjnë me dije se automjeti mund të ketë përfunduar në kanal që në orët pas mesnatës.
Deri më tani nuk dihet identiteti i personit që drejtonte mjetin në momentin e incidentit.
Policia ndodhet në vendngjarje dhe po kryen verifikimet përmes targave të automjetit, me qëllim identifikimin e pronarit dhe sqarimin e rrethanave të ngjarjes.
Automjeti vijon të ndodhet brenda kanalit vaditës, ndërsa autoritetet po punojnë për dokumentimin e plotë të rastit.








