IOM bën thirrje për solidaritet global në Ditën Ndërkombëtare të Migrantëve
Gjenevë, 18 dhjetor 2025 – Sot, teksa bota shënon Ditën Ndërkombëtare të Migrantëve (IMD), Organizata Ndërkombëtare për Migracionin (IOM) riafirmon migracionin si një histori mundësish, progresi njerëzor dhe zhvillimi të përbashkët, duke bërë thirrje për sisteme menaxhimi migracioni më të forta dhe më gjithëpërfshirëse, që mbrojnë personat në lëvizje dhe mbështesin komunitetet pritëse.
E shënuar çdo vit më 18 dhjetor, Dita Ndërkombëtare e Migrantëve njeh kontributin e migrantëve në mbarë botën dhe thekson rëndësinë e mbrojtjes së të drejtave dhe dinjitetit të tyre. Në vitin 2025, kjo ditë shënohet nën temën “Historia ime e madhe: Kulturat dhe Zhvillimi”, duke nxjerrë në pah se si lëvizja e njerëzve pasuron shoqëritë, nxit rritjen ekonomike dhe forcon lidhjet mes komuniteteve.
“Migracioni është i ndërthurur në jetën e familjeve dhe komuniteteve kudo. Ai është një histori guximi, vendosmërie dhe lidhjesh që na bashkojnë përtej kufijve,” tha Drejtoresha e Përgjithshme e IOM, Amy Pope. “Sot, ne nderojmë njerëzit që nisen në kërkim të sigurisë dhe mundësive dhe bëjmë thirrje për solidaritet global në ndërtimin e sistemeve të drejta dhe gjithëpërfshirëse që i mbrojnë ata. Kur migracioni menaxhohet me dinjitet dhe qëllim të mirë, ai sjell përfitime për të gjithë.”
Çdo migrant mbart me vete një histori personale shprese, guximi dhe dëshire për një jetë më të mirë. Kur sistemet arrijnë t’i mbrojnë njerëzit gjatë gjithë udhëtimit të tyre, këto histori mund të zhvillohen në mënyrë të sigurt. Sot, rreth 304 milionë njerëz, ose gati 4 për qind e popullsisë globale, jetojnë jashtë vendit të tyre të lindjes. Ky numër është rritur gradualisht, ndërsa njerëzit lëvizin për punë, siguri, arsim dhe bashkim familjar.
Migrantët kontribuojnë në shumë mënyra në komunitetet ku jetojnë dhe punojnë, duke sjellë aftësi, kreativitet dhe sipërmarrje që forcojnë ekonomitë lokale. Migrantët për arsye punësimi mbështesin sektorë thelbësorë si shëndetësia, ndërtimi, bujqësia dhe teknologjia, duke ofruar ndihmë jetike në vendet me popullsi në plakje.
Të ardhurat e tyre gjithashtu mbështesin familjet në vendet e origjinës. Në vitin 2024, migrantët dërguan rreth 905 miliardë dollarë në remitanca ndërkombëtare, shumica e të cilave shkuan drejt vendeve me të ardhura të mesme dhe të ulëta. Këto transferta ndihmojnë familjet të mbulojnë nevojat bazë si ushqimi, arsimi dhe kujdesi shëndetësor dhe, në shumë raste, remitancat tejkalojnë edhe ndihmën e huaj apo flukset e investimeve.
Përtej kontributit financiar, migrantët pasurojnë gjithashtu strukturën sociale dhe kulturore të komuniteteve. Ata sjellin ide të reja, nxisin shkëmbimin kulturor, ndërtojnë rrjete biznesi dhe gjenerojnë inovacion, duke përfituar si vendet e origjinës ashtu edhe ato të destinacionit.
Megjithatë, migracioni përballet me sfida gjithnjë në rritje. Deri në fund të vitit 2024, 83.4 milionë njerëz ishin të zhvendosur brenda vendit të tyre për shkak të konflikteve, dhunës dhe fatkeqësive natyrore, ndërsa emergjenca të reja vazhdonin të tejkalonin kapacitetet përballuese të komuniteteve.
Edhe pse shumica e migracionit ndodh në mënyrë të sigurt dhe të rregullt, shumë njerëz ende përballen me rreziqe serioze gjatë kalimit të kufijve, veçanërisht aty ku rrugët e rregullta janë të kufizuara. Personat që detyrohen të largohen papritur shpesh kanë pak alternativa dhe mund t’i drejtohen rrugëve të parregullta. Këto udhëtime shpesh përfshijnë kalime të rrezikshme detare dhe shkretinore, shfrytëzim dhe mungesë aksesesh në ndihmë dhe mbrojtje. Deti Mesdhe mbetet një nga rrugët më vdekjeprurëse të migracionit, me më shumë se 33,000 vdekje të regjistruara që nga viti 2014.
Çdo udhëtim migranti është i ndryshëm, por nevoja për siguri dhe dinjitet është universale. Duke forcuar sistemet që mbështesin njerëzit në çdo fazë të lëvizjes, shtetet mund të shfrytëzojnë përfitimet zhvillimore të migracionit dhe të mbrojnë të drejtat dhe mirëqenien e çdo personi në lëvizje.
Ndërsa migracioni vazhdon të formësojë botën tonë, Apeli Global i IOM për vitin 2026 synon të mbështesë 41 milionë persona në lëvizje dhe të forcojë sistemet që e bëjnë migracionin të sigurt, të rregullt dhe të rregulluar.
Për të shënuar Ditën Ndërkombëtare të Migrantëve, IOM fton njerëzit kudo të bashkohen me Drejtoreshën e Përgjithshme, Amy Pope, duke ndarë historitë e tyre të migracionit përmes hashtagut #MyGreatStory. Individët, komunitetet dhe liderët e biznesit inkurajohen të reflektojnë mbi mënyrën se si migracioni ka formësuar jetën, kulturën dhe kontributin e tyre, si dhe të bëhen pjesë e një bisede globale mbi rolin e mobilitetit njerëzor në nxitjen e zhvillimit dhe rritjes ekonomike.
