Krimi në familje në Kuman të Roskovecit, zbardhen detaje të reja nga hetimet

Kuman – Detaje të reja kanë dalë në dritë lidhur me ngjarjen e rëndë të ndodhur në fshatin Kuman të bashkisë Roskovec, ku një 80-vjeçar vrau bashkëshorten dhe më pas i dha fund jetës.

Sipas burimeve policore, djali i çiftit Rrapaj ka deklaruar në dëshminë e tij se në momentin e krimit ndodhej në Fier për një konsultë mjekësore, fakt i verifikuar edhe përmes kamerave të sigurisë. Ai ka treguar se i ati njihej si person konfliktual, ndërsa zënka e fundit mes tyre kishte ndodhur rreth 10 ditë më parë për një arsye banale.

Konflikti kishte nisur pasi djali kishte hedhur pleh në patatet e mbjella në oborrin e shtëpisë, veprim që kishte acaruar të atin. “Pse u hedh pleh patateve”, mësohet t’i ketë thënë 80-vjeçari, debat që më pas kishte përfunduar edhe në Komisariatin e Policisë së Roskovecit. Sipas dëshmisë, nëna, Dashuria, i dilte gjithmonë në krah të birit gjatë këtyre përplasjeve.

Djali ka rrëfyer se, pasi është kthyer nga Fieri, i ka gjetur prindërit të pajetë në banesë. Fillimisht ka njoftuar një kushëri të tij dhe më pas ka lajmëruar policinë.

Nga hetimet paraprake rezulton se arma e përdorur në krim është e një tipi të vjetër pushkë dhjetëshe, dhe dyshohet të ketë qenë e fshehur që prej vitit 1997, pasi është gjetur e mbuluar me dhe.

Sipas ekspertizës, arma është shkrepur dy herë: një plumb i ka marrë jetën bashkëshortes, ndërsa tjetri i ka shkaktuar vdekjen 80-vjeçarit, i cili dyshohet se është vetëvrarë.

Mësohet se 80 vjeçari kish debatuar me gruan në oborrin e shtepisë, më pas ka shkuar e ka marr me forcë e ka futur në banesë brënda. Aty është dëgjuar një krismë, pak minuta më pas edhe një krismë tjetër, pohuan burime nga grupi hetimor.

Grupi hetimor po vijon punën për zbardhjen e plotë të rrethanave të kësaj tragjedie të rëndë familjare.