Gjatë 76 ditëve të luftës me Hamasin, ushtria izraelite ka kryer një nga fushatat më të mëdha të bombardimeve në histori në enklavën e vogël, të bllokuar. Gazetarëve të huaj u është mohuar hyrja në Gaza, duke i bërë imazhet satelitore dhe të dhënat nga dronët të vetmen metodë të besueshme për të vlerësuar shkallën e dëmeve.
Financial Times ka kombinuar të dhënat nga satelitët komercialë me vlerësimet e dëmeve nga studiuesit e Qendrës CUNY dhe Universitetin Shtetëror të Oregonit. Imazhet tregojnë qartë se si inkursioni i Izraelit e ka bërë Gazën veriore praktikisht të pabanueshme.
Trupat izraelite tani po luftojnë me Hamasin në Khan Younis, një qytet në Gazën jugore dhe dëmet tashmë kanë filluar të ngjajnë me ato në veri, duke e kthyer pjesën më të madhe të asaj që ishte qendra e popullsisë së Gazës në një shkretëtirë. Gati 20 mijë banorë të Gazës janë vrarë, sipas zyrtarëve palestinezë në enklavë, pasi 1200 njerëz u vranë në Izrael në sulmi i Hamasit më 7 tetor. Izraeli ka thënë se 137 ushtarë të tij janë vrarë dhe vlerëson se ka ekzekutuar disa mijëra luftëtarë të Hamasit, një shifër që nuk mund të verifikohet në mënyrë të pavarur.
Qyteti i Gazës
Qyteti i Gazës ishte fokusi fillestar i pushtimit të Izraelit. Edhe përpara se trupat e IDF të hynin në qytetin verior, të cilin Izraeli e ka përshkruar si zemra e makinerisë politike dhe ushtarake të Hamasit, një fushatë e vazhdueshme bombardimi kishte shkatërruar zona të gjera të qendrës tregtare dikur të lulëzuar.
Për të marrë kontrollin operacional të qytetit, trupat izraelite e rrethuan atë nga jugu, më pas u përqendruan në vende të veçanta si spitali al-Shifa, lagjja e Rimalit dhe kampet e refugjatëve al-Shati dhe Jabalia. Lëvizjet e këmbësorisë izraelite u paraprinë nga breshëritë e të ashtuquajturave bomba memece, secila nga 1000 deri në 2000 paund, të cilat shkatërruan blloqet e banimit në qytet.
Kjo u pasua nga luftime në terren të kombinuara me sulme ajrore ndaj objektivave përpara tyre. Rreth 3/4 e qytetit të Gazës janë shkatërruar. Dëmin më të thellë duket se e kanë kampet e refugjatëve dhe qendra e qytetit, si dhe rreth al-Shifa dhe portit të Gazës. Ndërsa luftimet vazhdojnë në Shuja’iyya, rrugët kryesore të qytetit janë tani nën kontrollin e forcave izraelite.
Ka video të Forcave të Mbrojtjes të Izraelit, imazhe në mediat sociale apo raportime nga gazetarë palestinezë që tregojnë një peizazh të shkatërruar të zbrazur nga banorët. Pjesa më e madhe e popullsisë është larguar në jug pasi u urdhërua evakuimi i veriut. Rreth 1.8 milionë njerëz janë zhvendosur tani pranë kufirit me Egjiptin.
Khan Younis
Pasi fitoi kontrollin e qytetit të Gazës, ushtria izraelite dërgoi tanke afër Shuja’iyya, të cilat u drejtuan në jug drejt Khan Younis. Qyteti i dytë më i madh në enklavë është goditur nga forcat ajrore të Izraelit ditët e fundit. Popullsia e Khan Younis, me rrugët e ngushta, ishte mbipopulluar që në fillim nga palestinezë të zhvendosur, të cilët më pas u paralajmëruan të shkonin edhe më në jug.
IDF i ka përshkruar luftimet në Khan Younis si më të ashprat që ka hasur deri më tani. Në fillim të kësaj jave, ajo dërgoi një brigadë tjetër, të përbërë nga disa mijëra trupa, për të mbështetur përparimin e saj në qytetin ku u rritën udhëheqësit e lartë të Hamasit.
“Ne po intensifikojmë operacionet në Khan Younis dhe po i thellojmë ato” – tha kundëradmirali Daniel Hagari. Aleatët e Izraelit, duke përfshirë SHBA-në, Britaninë e Madhe dhe Gjermaninë, po bëjnë presion që IDF të marrë një qasje më konkrete, me ekipe më të vogla të forcave speciale që kryejnë bastisje në jug, në vend të fushatave të bombardimeve në shkallë të gjerë. Është e paqartë se kur dhe nëse Izraeli do të ulë intensitetin e operacionit të tij luftarak.
Ministri i Mbrojtjes Yoav Gallant nuk pranoi të japë një afat kohor për ndonjë ndryshim gjatë takimit të fundit me sekretarin e mbrojtjes të SHBA Lloyd Austin. Ai tregoi se teksa forcat izraelite të marrin kontrollin e pjesës më të madhe të Rripit, disa civilë mund të lejohen të kthehen në shtëpitë e tyre. Por, siç tregojnë të dhënat satelitore dhe të radarëve, pak shtëpi kanë mbetur ku ata të kthehen. /Marrë nga Financial Times,
