Rrugëtimi Armani-t/ Momentet që e bënë atë një ikonë të modës italiane

Giorgio Armani, njeriu që ndryshoi përgjithmonë modën dhe u njoh ndërkombëtarisht si “mbreti” i elegancës italiane, ndërroi jetë në moshën 91-vjeçare.

Autodidakt dhe vizionar, ai nisi karrierën e tij si dekorues vitrinash dhe përfundoi duke udhëhequr një nga perandoritë më të mëdha të modës në botë, gjithnjë si i vetmi pronar i markës që mbante emrin e tij: Armani.

Armani ishte për dekada dizajneri më i pasur në botë, ndërsa grupi i tij u bë simbol i suksesit dhe klasit italian në mbarë globin. Me një vizion të qartë dhe përkushtim të jashtëzakonshëm, ai transformoi mënyrën se si visheshin si burrat, ashtu edhe gratë, duke futur në modë prerjet e buta dhe kostumet ikonike “power suits” që shënuan vite të tëra, veçanërisht dekadën e viteve ’80.

Dizajnet e tij u panë në mbi 200 filma të njohur, nga American Gigolo te The Wolf of Wall Street, dhe u veshën nga disa prej figurave më të rëndësishme të Hollywood-it, duke vendosur standardet për veshjet e tapetit të kuq.

Filozofia e tij ishte e thjeshtë, por e fuqishme: “Eleganca nuk është të të shikojnë. Është të të mbajnë mend.”

Armani besonte në fuqizimin e grave dhe ndjeshmërinë e burrave, ndërsa estetika e tij bazohej në minimalizëm, finesë dhe kohëzgjatje. Ai solli një vizion të ri mbi modën, larg tendencave kalimtare dhe afër vlerave të qëndrueshme.

I lindur në vitin 1934 në një familje të varfër në qytetin Piacenza, frymëzimin e parë e mori nga modestia elegante e prindërve të tij dhe nga kinemaja, që u bë “shkolla” e parë e tij estetike.

Në vitin 1975, së bashku me partnerin e tij Sergio Galeotti, themeloi shtëpinë Armani, duke hedhur themelet e një prej emrave më të mëdhenj në historinë e modës.

Një trashëgimi që tejkalon modën

Armani ndërtoi një perandori që përfshin linja si Emporio Armani, Armani Exchange, Armani Privé, por edhe hotele, restorante, kozmetikë dhe parfume luksoze.

Me një kontroll të rreptë mbi çdo aspekt të biznesit dhe një këmbëngulje për të ruajtur pavarësinë e tij, ai krijoi një markë që sot është sinonim i luksit dhe elegancës.

Trashëgimia e tij nuk matet vetëm me miliardat që fitoi, por me vizionin e tij për elegancën, një përkufizim që e tejkalon veshjen dhe bëhet qëndrim ndaj jetës.

Momentet që formësuan ikonën Armani

1975 – Debutimi revolucionar

Koleksioni i tij i parë solli linja të pastra dhe një strukturë të butë, duke hequr dorë nga formaliteti i rëndë i kostumeve të meshkujve. Burrat u veshën me stil më të lirshëm, më të sofistikuar.

1980 – “American Gigolo”

Richard Gere i veshur me Armani në këtë film e ktheu stilin e tij në simbol sensualiteti dhe elegance mashkullore.

1981 – Grace Jones në “Nightclubbing”

Xhaketa arkitekturore e Armani në kopertinën e albumit u bë ikonë e stilit androgjen dhe fuqisë përtej gjinive.

1990 – Julia Roberts në Golden Globes

Me një kostum oversize, këmishë dhe kravatë Armani, Roberts shkroi histori në tapetin e kuq dhe sfidoi kufijtë midis stilit të burrave dhe grave.

Vitet ’90 – “Çmimet Armani”

Oscar-ët u quajtën në mënyrë jozyrtare “Armani Awards”, pasi yje si Robert De Niro dhe Kim Basinger u vishën pothuajse ekskluzivisht nga ai.

Filmat e mëdhenj si pasarelë

Nga Christian Bale në The Dark Knight Rises, te Leonardo DiCaprio në The Wolf of Wall Street dhe Ethan Hawke në Gattaca, kostumet Armani bënë historinë edhe në kinematografi.