Shën Kozmai bashkon besimtarët në Kolkondas, pelegrinë nga Shqipëria dhe Greqia mbushin manastirin
FIER – Me qindra besimtarë të krishterë, por edhe pelegrinë të ardhur nga qytete të ndryshme të Shqipërisë dhe nga Greqia, janë mbledhur paraditen e sotme në Manastirin e Shën Kozmait në Kolkondas të Libofshës, për të marrë pjesë në festimet kushtuar një prej figurave më të rëndësishme të besimit ortodoks në Myzeqe.
Pelegrinazhi drejt manastirit ka nisur që mbrëmjen e së dielës, ndërsa shumë besimtarë kanë zgjedhur të qëndrojnë gjatë natës pranë këtij vendi të shenjtë, në një akt përkushtimi dhe besimi te Shën Kozmai.
Atmosfera në oborrin e manastirit ka qenë e mbushur me lutje, ndezje qirinjsh dhe vizita pranë vendit ku, sipas traditës, prehet shenjtori.
Festa e Shën Kozmait është një prej ngjarjeve më të rëndësishme fetare që zhvillohen çdo vit në Myzeqe. Për besimtarët, kjo ditë nuk është vetëm një ceremoni fetare, por një moment reflektimi, lutjeje dhe bashkimi shpirtëror.
Shën Kozmai nderohet si martir i besimit të krishterë, ndërsa figura e tij lidhet edhe me përhapjen e arsimit dhe të gjuhës shqipe. Për këtë arsye, kujtimi i tij ka një rëndësi të veçantë jo vetëm për komunitetin ortodoks, por edhe për historinë dhe traditën kulturore të kësaj zone.
Në oborrin e manastirit, qindra besimtarë kanë ndezur qirinj dhe kanë përcjellë lutjet e tyre, duke kërkuar shëndet, paqe, mbarësi dhe mirëqenie për familjet e tyre. Të shumtë kanë qenë edhe pelegrinët e ardhur nga Greqia, të cilët kanë udhëtuar drejt Kolkondasit për të marrë pjesë në ceremonitë kushtuar Shën Kozmait.
Për ta, kjo festë është një moment i veçantë besimi, por edhe një mundësi për të forcuar lidhjet mes njerëzve të dy vendeve.
Historia dhe gojëdhënat e përcjella ndër breza tregojnë se Shën Kozmai u vra më 24 gusht të vitit 1779 nga Kurt Pasha. Sipas traditës, trupi i tij u gjet po atë ditë në lumin Seman nga një prift i zonës dhe më pas u vendos në vendin ku sot ndodhet manastiri.
Ceremonitë fetare kanë vijuar mëngjesin e sotëm me meshën solemne, ku kanë marrë pjesë drejtues të lartë të Kishës Ortodokse. Mes tyre ka qenë edhe Mitropoliti i Fierit dhe Apolonisë, Hirësia e Tij Nikolla Hyka, ndërsa ceremonitë janë shoqëruar me lutje dhe mesazhe për paqe, dashuri dhe solidaritet.
Nga Manastiri i Shën Kozmait, Mitropoliti Nikolla Hyka ka përcjellë urimet për të gjithë besimtarët, duke u ndalur te rëndësia e besimit dhe e sakrificës përtej interesit personal.
“Mesazhi im kryesor është që me besim ne duhet të sakrifikojmë përtej interesit personal, duke dhuruar dashuri për të gjithë.”
Manastiri i Shën Kozmait në Kolkondas është kthyer ndër vite në një prej qendrave më të rëndësishme të pelegrinazhit fetar në Myzeqe. Çdo vit, më 23 dhe 24 gusht, qindra dhe mijëra besimtarë mbërrijnë në këtë vend të shenjtë nga Fieri, Myzeqeja, qytete të tjera të Shqipërisë, por edhe nga Greqia.
Për shumë prej tyre, udhëtimi drejt Kolkondasit është një traditë e trashëguar nga prindërit dhe gjyshërit. Ka prej atyre që vijnë për të ndezur një qiri, për të bërë një lutje apo për të falënderuar Shën Kozmain për një të mirë të besuar si mrekulli.
Por festa e këtij viti përcjell edhe një tjetër mesazh: atë të bashkimit dhe të paqes. Besimtarë nga të dyja anët e kufirit janë bërë pjesë e së njëjtës ceremoni, duke e kthyer Kolkondasin për dy ditë në një pikëtakim të besimit, traditës dhe kulturës.
Nën tingujt e ceremonive fetare, me qirinj të ndezur dhe lutje të përcjella në heshtje, pelegrinazhi në nderim të Shën Kozmait vijon të mbetet një prej traditave më të forta shpirtërore të Myzeqesë, një traditë që përcillet brez pas brezi dhe që çdo vit sjell në Kolkondas besimtarë nga Shqipëria dhe jashtë saj.ALB365
