Të dielën do të jetë një moment historik për futbollin, në stadiumet e Miamit nis për herë të parë FIFA Club World Cup 2025, një turne i përmasave globale që përfshin 32 skuadra nga e gjithë bota dhe ndjek modelin e Kupës së Botës për Kombëtare.
Ndeshja hapëse sjell përballjen mes Inter Miami, me katërshen e famshme Messi–Suárez–Busquets–Alba, dhe Al-Ahly të Egjiptit, kampionët e Afrikës, që kërkojnë të shkruajnë një faqe të re në historinë e tyre ndërkombëtare.
🌍 Formati i ri, përmasa botërore
Për herë të parë, ky turne përfshin:
12 ekipe nga Europa
6 nga Amerika e Jugut
5 nga Amerika e Veriut & Qendrore
4 nga Azia
4 nga Afrika
1 nga Oqeania
Një strukturë që jo vetëm përfaqëson të gjitha kontinentet, por edhe e transformon këtë kompeticion në një “Champions League globale”.
💰 Shifra marramendëse
Me një investim që kap vlerën e 1 miliard dollarëve, ky kompeticion është ndër më të pasurit në historinë e klubeve, ndërsa fituesi do të përfitojë deri në 125 milionë dollarë.
⚽ Favoritët dhe sfidat
Skuadrat europiane si Manchester City, Real Madrid, PSG dhe Bayern Munich shihen si pretendentët kryesorë. Në turne marrin pjesë edhe Juventus dhe Inter, me këtë të fundit që vjen pas një sezoni të vështirë dhe me Christian Chivun në krye si trajner i ri.
Një faktor që pritet të ndikojë në performancën e ekipeve është edhe klima e nxehtë e SHBA-së, një test i vërtetë për formën fizike të lojtarëve – dhe një “provë gjenerale” për Kupën e Botës 2026 që do të zhvillohet po aty, në SHBA, Meksikë dhe Kanada.
FIFA Club World Cup 2025 ka nisur rrugëtimin si një projekt ambicioz, por me potencial të jashtëzakonshëm për të ndryshuar mënyrën si perceptohet futbolli i klubeve në nivel global. Një turne që përveç spektaklit, pritet të sjellë fitime rekord dhe përballje që deri më sot ishin të paimagjinueshme në faza kaq të hershme të një sezoni.
