Nuk ka fitues në derbin e kryeqytetit e ata që gëzojnë janë në Rrogozhinë. Egnatia tani është kryesuese e vetme, me Partizanin që nuk mund t’i kalojë as nëse fiton rikuperimin me Teutën të mërkurën. Mbyllet 1-1, një ndeshje e luftuar, me shëmtinë e atyre tifozëve që tentonin të godisnin lojtarët kundërshtarë me copa stolash të thyera, me flakadanët e zakonshëm e me një sherr që rrezikoi të degjeneronte mes Dokës e Rrapajt. Në fusha pastaj vendosi Hasani, që as nuk duhej ta luante këtë ndeshje e Keko, asi nën mëngë i Abilaliajt.
STOLA TË THYER MBI LOJTARËT
Ndeshja në “Air Albania” nisi me vonesë për shkak të hedhjes së mjeteve piroteknike nga ana e tifozëve. E këtu u kuptua shfaqja me të cilën Tirana e Partizani duhet të bënin gjatë gjithë derbit 201 të kryeqytetit. Tifozët më pas u bënë shkaktarë edhe për nderprerjen e ndeshjes për hedhjen e sendeve të forta në fushë. Madje u rrezikuan edhe lojtarët kur Najdovski e Mba e pësuan nga copat e thyera të stolave.
VENDOSI HASANI E KEKO
Nuk duhej të luante, por mjekët e Tiranës bënë të pamundurën që Hasani të ishte në fushë. E pikërisht numri 9 shënoi golin e avantazhit për bardheblutë në minutën e 28′. Goli i 9 për sulmuesin e Tiranës, goditja e të cilit nuk i la asnjë shans Qirkos, e është tani shënuesi më i mirë i kampionatit, duke arritur të ndjerin Dëamena.
Tirana asfiksuese në presing vuajti limitet fizike në pjesën e dytë dhe Partizani mori skenën, edhe falë zëvendësimeve që janë luks për Abilaliaj. në fushë Mensah e Keko dhe pikërisht ish-sulmuesi i Korabit barazoi në minutën e 79′. Murataj shërbeu në qendër dhe Keko me të majtën mposhti Abdullahun.
SHERR NË FUSHË E PAS NDESHJES
Doka dhe Rrapaj nuk i kontrolluan dot nervat e tyre, duke u përplasur fizikisht në pjesën e dytë. Dy lojtrarët shpëtuan me nga një karton të verdhë, pavarësisht kapjes me duar e shtyrjeve të forta. Cështja është se të vazhduan edhe pas përfundimit të lojës dhe mund të jenë pjesë e Komisionit të Etikës e Disiplinës, falë pamjeve filmike.
