Meta pezullon bisedat e të miturve me personazhe të krijuar nga IA

Meta ka vendosur të pezullojë përkohësisht aksesin e adoleshentëve në personazhet virtualë të vendosur në platformën Meta AI.

Ky kufizim ndikon në avatarët e personalizuar në Instagram, Facebook dhe Messenger, në tregjet ku kjo veçori ishte e disponueshme. Asistenti i inteligjencës artificiale i Metës, një konkurrent i ChatGpt dhe Gemini, do të mbetet i disponueshëm për të miturit me mbrojtje të përshtatshme për moshën. Siç shpjegohet në një deklaratë nga grupi, e cila përditëson një komunikim nga tetori i kaluar, masa do të hyjë në fuqi në javët e ardhshme.

“Adoleshentët nuk do të jenë më në gjendje të hyjnë në personazhet e inteligjencës artificiale në aplikacionet tona, derisa përvoja e përditësuar të jetë gati”, thuhet anë deklaratë. “Kjo do të vlejë për këdo që ka dhënë datën e lindjes, si dhe për njerëzit që pretendojnë të jenë të rritur, por që dyshojmë se janë të mitur, bazuar në teknologjinë tonë të parashikimit të moshës.”

Vitin e kaluar, Meta lançoi dhjetëra personazhe të inteligjencës artificiale të disponueshëm nga platforma Meta AI në tregje të zgjedhura, shumë prej të cilëve u krijuan në bashkëpunim me ikona të kulturës pop, atletë dhe influencues.

Sipas faqes së internetit Techcrunch, gjigandi ka marrë kërkesa nga prindërit që kërkojnë më shumë informacion dhe kontroll mbi ndërveprimet e adoleshentëve me chatbot-et, pjesë e një debati më të gjerë rreth ndikimit të Inteligjencës Artificiale në sjelljen e fëmijëve. Zëdhënësja Sophie Vogel shtoi për The Verge se “kur versioni i ri të jetë i disponueshëm, ai do të përfshijë kontrollet prindërore”. / ANSA.