Bylis thyen Vllazninë mes polemikave: Martini i tërbuar për penalltinë e padhënë
Bylisi ka marrë një fitore shumë të rëndësishme në shtëpi ndaj Vllaznisë, duke i shkaktuar shkodranëve humbjen e parë pas një serie ndeshjesh me fitore. Ballshiotët, nën drejtimin e Mirel Josës, fituan 2-1 me golat e Stoilov dhe Sanogo. Bylis riktheu emocionet në garën për mbijetesë dhe tregoi karakter në momentet vendimtare.
Goli i parë erdhi në minutën e 48-të. Stoilov shënoi një supergol nga jashtë zonës, duke mposhtur portierin Pohls dhe kaloi Bylisin në avantazh. Ndeshja u mbajt e hapur deri në minutat e fundit. Por në minutën e 90’+7’ Sanogo shënoi golin e dytë për vendasit pas një kundërsulmi që vulosi ndeshjen. Vllaznia arriti të ngushtojë rezultatin në 2-1 me golin e Tafilit në minutën e 90’+9’. Por kjo mbeti vetëm për statistikë dhe nuk mjaftoi për të marrë pikë.
Me këtë fitore, Bylisi ngjitet në kuotën e 23 pikëve në vendin e 8-të dhe ringjall shpresat për mbijetesën në Superiore. Ndërsa Vllaznia mbetet në krye të tabelës me 48 pikë, por me humbje të papritur që hapi garën në kampionat.
Episodi i polemikave
Me rezultatin 1-0 ndeshja mund të merrte tjetër rrjedhë. Topi u prek me dorë nga Stoilov, por arbitrja Emanuela Rusta la lojën të vazhdonte. VAR e thirri gjyqtaren të rishikonte pamjet, por për herë të parë në këtë sezon arbitri mbajti vendimin e fushës. Në fakt prekja ishte evidente dhe Rusta i mohoi Vllaznisë penalltinë që mund të evitonte humbjen.
Mirel Josa: “Sot na bënte punë vetëm 3 pikëshi”
Pas fitores së rëndësishme 2-1 ndaj Vllaznisë, trajneri Mirel Josa përgëzoi ekipin për lojën dhe për tri pikët e arta, duke theksuar se rezultati ishte më i rëndësishëm sesa perfeksioni në lojë. Ai pranoi se kishte disa momente ku skuadra nuk interpretoi mirë fazat e lojës dhe veçoi mungesën e lëvizjeve sulmuese në zonën e majtë, ku ekipi nuk shfrytëzoi si duhet mbështetjen e mesfushorëve qendrorë dhe lojtarëve të krahut.
Josa shtoi se, megjithatë, tri pikët ishin prioritet dhe vlerësoi performancën e skuadrës ndaj një kundërshtari të fortë si Vllaznia, duke nënvizuar se do të vazhdojnë të punojnë për përmirësime taktike në ndeshjet e ardhshme.
