Vlorë – Muharem Koroveshi alias Muharem Ismaili alias Muharem Myftaraj, është arrestuar nga Policia e Shtetit pasi akuzohet se së bashku me dy persona të tjerë porositën dhe organizuan kryerjen e një atentati në qytetin e Vlorës.
“Gjatë operacionit, u bë ekzekutimi i urdhrit të prokurorit të Prokurorisë së Posaçme të Shkallës së Parë për Korrupsionin dhe Krimin e Organizuar, për ekzekutimin e vendimit të Gjykatës së Posaçme të Shkallës së Parë për Korrupsionin dhe Krimin e Organizuar, për shtetasin M. K. alias M. I. alias M. M., 35 vjeç, banues në Vlorë”, thuhet në njoftim.
Ata akuzohen për veprat penale “Sigurimi i kushteve dhe i mjeteve materiale për të kryer vrasje”, “Mbajtja pa leje dhe prodhimi i armëve, armëve shpërthyese dhe i municionit”, të kryera në bashkëpunimin e posaçëm të grupit të strukturuar kriminal, “Grupi i strukturuar kriminal” dhe “Kryerja e veprave penale nga grupi i strukturuar kriminal dhe organizata kriminale”.
Po ashtu, dy persona të tjerë janë shpallur në kërkim.
