Blaise Metreweli/ Gruaja e parë në krye të shërbimeve sekrete britanike

Blaise Metreweli do të jetë gruaja e parë që do të drejtojë departamentin britanik të inteligjencës së jashtme. Kjo nuk ka ndodhur kurrë më parë në historinë 116-vjeçare të MI6. Vendimi u njoftua nga Kryeministri Keir Starmer pas mbërritjes së tij në Kanada për samitin e G7.

Kush është Blaise Metreweli? 47-vjeçarja ka qenë në shërbimin e inteligjencës që nga viti 1999 dhe do të pasojë Sir Richard Moore në vjeshtë. Kështu, ajo do të bëhet kreu i 18-të i shërbimit sekret britanik. Metreweli aktualisht shërben si drejtoreshë e përgjithshme e Seksionit “Q”, përgjegjëse për teknologjinë dhe inovacionin në sektorin e inteligjencës jashtë vendit. Gjatë karrierës së saj, ajo ka mbajtur pozicione të tjera të larta në MI6 dhe MI5, agjencinë për sigurinë e brendshme dhe kundër-spiunazhin. Ajo ka studiuar antropologji kulturore në Universitetin e Kembrixhit dhe ka pasur role operative në Lindjen e Mesme dhe Evropë.

“Emërimi historik i Blaise Metreweli vjen në një kohë kur puna e shërbimeve tona të inteligjencës nuk ka qenë kurrë më e rëndësishme”, – tha Starmer. “Mbretëria e Bashkuar po përballet me kërcënime të një shkalle të paparë, qoftë nga sulmuesit që dërgojnë anije spiune në ujërat tona apo nga hakerat, planet e sofistikuara kibernetike të të cilëve synojnë të kompromentojnë shërbimet tona publike”, – shtoi ai.

Vetë Metreweli tha se ishte “krenare dhe e nderuar” nga emërimi. “MI6 luan një rol jetësor në sigurimin e sigurisë së qytetarëve britanikë dhe promovimin e interesave të Mbretërisë së Bashkuar jashtë vendit. Pres me padurim të vazhdoj të punoj përkrah agjentëve të guximshëm të MI6 dhe partnerëve tanë ndërkombëtarë”, – u shpreh Blaise Metreweli.
Sir Richard Moore, kreu në largim i inteligjencës së jashtme i cili do të japë dorëheqjen në vjeshtë, theksoi “aftësitë udhëheqëse të Blaise”, duke thënë se ishte i bindur se do ta linte MI6 në duar të mira.

Shërbimet sekrete të jashtme britanike nuk ishin drejtuar kurrë nga një grua, ndërsa në krye të degës tjetër të inteligjencës, MI5 (e cila merret me sigurinë kombëtare), ka dy precedentë: Stella Rimington ishte drejtuese nga viti 1992 deri në vitin 1996, ndërsa Eliza Manningham-Buller ishte nga viti 2002 deri në vitin 2007. Në vitin 2023, Anne Keast-Butler ishte gruaja e parë e emëruar për të drejtuar GCHQ.

Departamenti MI6 është nën juridiksionin e Ministrisë së Jashtme, të kryesuar nga David Lammy, i cili deklaroi se Metreweli ishte kandidatja “ideale”. Kreu i MI6 është emri i vetëm që japin shërbimet e inteligjencës së jashtme të Britanisë dhe ai e identifikon veten vetëm me shkronjën “C” sepse kreu i parë i agjencisë së parë të spiunazhit të Britanisë, Byrosë së Shërbimit Sekret, ishte Kapiteni Mansfield Cumming, i cili gjithmonë e firmoste “C”. Që nga ajo kohë, emri i koduar mbeti kështu.

“C” është gjithashtu anëtar i Komitetit të Përbashkët të Inteligjencës, me drejtues të tjerë departamentesh dhe zyrtarë të lartë qeveritarë. Ai merr raporte nga departamenti dhe këshillon Kryeministrin