Cruz Beckham ka ndarë një postim që ka tërhequr vëmendjen në Instagram, vetëm pak ditë pasi vëllai i tij më i madh, Brooklyn Beckham, publikoi akuza të rënda ndaj prindërve të tyre, David dhe Victoria Beckham.
20-vjeçari postoi në Instagram Stories një foto ku shfaqet duke mbajtur në dorë një kanaçe të pijes braziliane Guaraná Antarctica, e shoqëruar me këngën e nënës së tij, Victoria Beckham, “I’m Not Such an Innocent Girl” (2001).
Edhe pse Cruz nuk dha asnjë shpjegim, zgjedhja e këngës u interpretua si domethënëse. Teksti flet për çlirimin nga perceptimi i brishtësisë dhe refuzimin e imazhit të një vajze të pambrojtur, me vargje si: “If you touch me I won’t break / Don’t think of me that way”.
Në këngë, Victoria Beckham këndon gjithashtu: “Don’t wrap me up in cotton wool / I’m not such an innocent girl” dhe thekson se nuk është prej “porcelani” apo “qelqi”, duke përcjellë një mesazh force dhe pavarësie.
Interesant është fakti se kënga ikonike e Victoria Beckham, pjesë e albumit të saj debutues, u rikthye në krye të klasifikimeve në Mbretërinë e Bashkuar pas konfirmimit të përçarjes së saj me Brooklyn.
Në një postim të dytë, Cruz ndau gjithashtu një foto ku shfaqej titulli i një kënge të re të tij, “The Loneliest Boy”, duke shtuar më tej natyrën enigmatike të mesazheve të tij.
Postimet e Cruz vijnë në një moment të tensionuar familjar, pasi Brooklyn Beckham, 26 vjeç, publikoi më herët këtë javë një deklaratë të ashpër në Instagram, ku akuzoi prindërit e tij për kontroll të vazhdueshëm mbi jetën e tij dhe për mungesë respekti ndaj bashkëshortes së tij, Nicola Peltz.
“Nuk dua të pajtohem me familjen time. Nuk jam duke u kontrolluar më – për herë të parë në jetën time po mbroj veten,” shkroi Brooklyn, duke shtuar se prindërit e tij kanë manipuluar për vite me radhë narrativën publike rreth familjes.
Ai i akuzoi gjithashtu David dhe Victoria Beckham se janë përpjekur “pa pushim” të dëmtojnë marrëdhënien e tij me Peltz, duke pretenduar se Victoria ftonte gra nga e kaluara e tij në prani të tyre.
Mes akuzave të tjera, Brooklyn deklaroi se Victoria u tërhoq nga realizimi i fustanit të nusërisë për Nicola Peltz dhe se kishte pasur sjellje të papërshtatshme gjatë dasmës së tyre në vitin 2022.
Një burim i afërt me çiftin i tha Page Six se “çdo gjë që Brooklyn ka deklaruar është e vërtetë”.
David dhe Victoria Beckham nuk kanë reaguar ende publikisht ndaj akuzave. Megjithatë, David Beckham foli në mënyrë të tërthortë për “gabimet e fëmijëve” dhe ndikimin e rrjeteve sociale gjatë një interviste të fundit televizive.
