Dalin fotot dramatike të arrestimit/ Lirohet ish-princi Andrew i Britanisë
Ish-princi Andrew i Britanisë së Madhe u lirua pak orë pas arrestimit të tij. Policia deklaroi se ai ishte lënë i lirë, por hetimi është duke vazhduar dhe ai mbetet i dyshuar për shpërdorim të detyrës publike.
Princi është fotografuar nga Reuters në një makinë i shoqëruar nga policia ku shfaqej dukshëm i tronditur. Ai duket i zhytur në sediljen e tij, ndoshta për të shmangur kamerat dhe fotografët.
Ky është një imazh i paprecedentë në historinë britanike. Një anëtar i familjes mbretërore, një princ, në duart e policisë i akuzuar si i përfshirë në një skandal të madh dhe të profilit të lartë.
Ai qëndroi në paraburgim për 12 orë. Deri më tani nuk ka asnjë informacion nga policia se çfarë do të ndodhë më pas, megjithëse dihet se akuzat ka të ngjarë të jenë të rënda dhe dënimi mund të arrijë edhe në burgim të përjetshëm.
Çfarë thotë policia?
Në një deklaratë pas lirimit të Andrew autoritetet deklaruan: “Policia e Thames Valley është në gjendje të japë një përditësim mbi hetimin për veprën penale të shkeljes së detyrës. Të enjten arrestuam një burrë të moshës midis 60 dhe 70 vjeç nga Norfolk me dyshimin për shkelje të detyrës.
Personi i arrestuar tani është liruar dhe mbetet nën hetim. Gjithashtu mund të konfirmojmë se hetimet tona në Norfolk tani kanë përfunduar. Duket se hetimet policore në Berkshire po vazhdojnë. Policia e Thames Valley thotë se nuk do të bëjë deklarata të mëtejshme në këtë kohë.”
Arrestimi dhe hapat e mëtejshëm
Princi i rrëzuar u arrestua të enjten (në ditëlindjen e tij të 66-të) me dyshimin për keqpërdorim të detyrës publike. I njëjti hetim po shqyrtonte pretendimet se një grua e dytë u dërgua në Mbretërinë e Bashkuar nga Epstein për një takim seksual me Andrew, por procedurat e sotme kanë të bëjnë vetëm me shpërdorimin e detyrës.
Arrestimi lidhet me dokumente konfidenciale që dyshohet se i janë kaluar financuesit pedofil Jeffrey Epstein nga vëllai i Mbretit Charles III, teksa ai shërbente si i dërguar tregtar. Dokumentet e publikuara nga autoritetet amerikane treguan qartë se Andrew dhe Epstein kishin një marrëdhënie të ngushtë për vite me radhë, e cila ndoshta shkoi përtej shkëmbimit të informacionit.
Policia britanike bastisi shtëpinë e Mountbatten-Windsor në Anglinë lindore të hënën në mëngjes. I njëjti burim tha se makina policie me targa konvencionale dhe rreth 8 oficerë të veshur civilë u panë duke mbërritur në Wood Farm në Sandringham. Andrew, fëmija i tretë i Mbretëreshës së ndjerë Elizabeth, gjithmonë ka mohuar çdo shkelje në lidhje me Epstein dhe ka thënë se i vjen keq për miqësinë e tij me të.
