Princi Harry ka thyer heshtjen pas takimit të shumëpritur me Mbretin Charles III, duke dhënë një përditësim të shkurtër mbi gjendjen shëndetësore të monarkut.
Duka i Sussex-it, 40 vjeç, u pa duke mbërritur në rezidencën Clarence House në Londër, ditën e mërkurë, për një “çaj privat” me babanë e tij. Takimi mes tyre zgjati 55 minuta – dhe shënon herën e parë që ata flasin ballë për ballë pas plot 20 muajsh.
Menjëherë pas bisedës mes babë e biri, autori i librit “Spare” iu përgjigj një kalimtari që e pyeti për gjendjen e mbretit, i cili është diagnostikuar me kancer.
“Ai është mirë, faleminderit,” tha Harry me një buzëqeshje.
Pas takimit, Princi Harry u nis drejt ndërtesës “Gherkin” në qendër të Londrës, ku mbajti një event të organizuar nga Invictus Horizons – një iniciativë e fondacionit të tij për të mbështetur të plagosurit në luftë.
Harry mbërriti me vonesë për shkak të trafikut të rënduar në Londër, i shkaktuar nga grevat në transportin publik. Si ish-anëtar i familjes mbretërore me detyra zyrtare, ai nuk përfiton më nga eskorta policore me drita blu.
Mbretit Charles, 76 vjeç, i cili udhëtoi nga rezidenca verore në Balmoral për të qenë në Londër, thuhet se kishte zhvilluar tri takime private atë ditë – një prej tyre me të birin. Megjithatë, vëllai i madh, Princi William, ishte i munguar në këtë takim, dhe raportohet se nuk ka pasur komunikim mes tij dhe çiftit Harry-Meghan prej vitesh.
Ky takim vjen në një kohë të ndjeshme për familjen mbretërore. Më herët këtë vit, Harry humbi betejën ligjore ndaj qeverisë britanike për të rifituar mbrojtjen e paguar nga taksat për veten dhe familjen e tij.
Në një intervistë për BBC pas vendimit, ai kishte deklaruar:
“Babai im nuk do të flasë me mua për shkak të gjithë kësaj çështjeje të sigurisë… por unë do të doja shumë të pajtoheshim. Jeta është e çmuar. Nuk e di sa kohë më ka mbetur me të.”
