Fruta të thata dhe alkool, një binom i rrezikshëm për ata që vuajnë nga alergjitë

Kush është alergjik ndaj arrave, bajameve, etj., duhet të jetë i kujdesshëm për të shmangur disa ushqime. Por një studim i ri zbulon një rrezik të papritur: alkooli mund të komplikojë këto alergji dhe, në disa raste, t’i përkeqësojë ato. Ky zbulim vjen nga një kërkim i gjerë i Universitetit McGill.

Shkencëtarët shqyrtuan mbi 1.100 raste emergjente në Kanada gjatë një periudhe dhjetëvjeçare dhe gjetën një rrjet kompleks lidhjesh midis asaj që shkakton alergjitë dhe mënyrës se si trupi reagon. Ushqimi del si shkaku kryesor, pasi shkakton më shumë se gjysmën e reaksioneve anafilaktike të regjistruara në spitalet e urgjencës. “Për mjekët, kuptimi i këtyre mekanizmave do të thotë mundësia për të shpëtuar jetë me ndërhyrje më të shpejta dhe të fokusuara,” shpjegon Roy Khalaf, autori kryesor i kërkimit.

Mjekët kanë identifikuar shkaqet specifike në reaksione: ndërsa pickimet e insekteve kanë tendencë të shkaktojnë probleme kardiovaskulare, frutat e thata shpeshherë shkaktojnë ngushtimin e fytit. Simptomat që kërkojnë trajtime të ndryshme: reaksionet ndaj arrave, bajameve etj., për shembull, kanë dy herë më shumë mundësi të kërkojnë Epinephrine (adrenalinë) gjatë hospitalizimit. Jo vetëm kaq: nëse pacientët me alergji ndaj medikamenteve kanë 32% më pak mundësi për të përdorur antihistaminikë pas shkarkimit, ata që janë alergjikë ndaj frutave të thata, shpesh kanë nevojë për to.

Përzierje e pasigurt – deri këtu nuk ka asgjë të re. Zbulimi është se alkooli rrit me 51% rrezikun e reaksioneve të rënda tek personat alergjikë ndaj frutave të thata. “Me shumicën e ëmbëlsirave me fruta të thata dhe pijeve speciale gjatë festave, rreziku i ekspozimit aksidental ndaj alergjenëve kërkon vëmendje të veçantë,” thekson Khalaf.

Dhe industria ushqimore dhe e pijeve duhet të fillojë ta marrë parasysh këtë, pasi shpesh pije me aroma artificiale mund të përmbajnë gjurmë alergjenësh të mjaftueshëm për të shkaktuar reaksione. Ekipi e McGill tani po shqyrton ato reaksione më të lehta që nuk kërkojnë ndihmën e urgjencës, me qëllimin për të kuptuar më mirë lidhjen midis frutave të thata dhe alkoolit. Njohuri që mund të çojë në diagnoza më të shpejta (dhe të sigurta) në urgjencë për ata që janë në rrezik të shokut anafilaktik.