Dhjetori ka mbërritur dhe qytetet janë mbështjellë me dritat e festave. Me kalimin e viteve, mënyra si festojmë ka ndryshuar, por simboli i pandryshuar që prej dekadash paralajmëron afrimin e festave është ndriçimi i bredhit më 6 dhjetor. Kartolinat e dikurshme i kanë lënë vendin urimeve virtuale, por atmosfera mbetet po ajo: e ngrohtë, pak nostalgjike dhe ëndërrimtare.
Në këtë frymë, PrivacyJournal ka përzgjedhur destinacionet më të bukura të Krishtlindjeve. Pas një shqyrtimi të kujdesshëm të çmimeve, ofertave turistike, akomodimeve dhe opsioneve shumëgjuhëshe, rezultati është i qartë: Europa vazhdon të mbajë fronin e festave, me nëntë nga dhjetë qytetet më magjike të sezonit.
Ja si renditen qytetet këtë vit:
10. Roma, Itali
Roma njihet për Krishtlindje mesdhetare, të ngrohtë dhe plot dritë, ku çdo shëtitje ndërthur hijeshinë e qytetit me traditat italiane. Aroma e temjanit, tingulli i kambanave dhe dritat e arta që ndriçojnë mbi rrugicat antike i japin qytetit një shkëlqim të qetë. Vizitorët mund të ndjekin Meshën e Mesnatës në Bazilikën e Shën Pjetrit dhe shohin ndezjen e pemës gjigante në Sheshin e Shën Pjetrit
9. Kopenhagë, Danimarkë
Tivoli Gardens kthehet çdo dhjetor në një botë përrallore. Dekorimet plot stil i japin një shkëlqim qytetit, ndërsa parada e Krishtlindjes e Gardës së Tivolit mbetet një nga momentet më të bukura.
8. Quebec City, Kanada
Qyteti i Vjetër i Québec-ut, me tregun e tij të Krishtlindjeve, të çon larg e të lë të harrosh se je në Amerikën e Veriut. Rrugicat e gurta, fasadat e ndriçuara dhe atmosfera festive duket sikur kanë dalë nga një kartolinë. Vizitorët mund të bëjnë shëtitje me karroca të tërhequra nga kuaj në rrugicat e mbuluara me borë dhe të përjetojnë traditat e Krishtlindjes së Québec-ut, ku bashkohen ndikimet franceze, britanike dhe indigjene.
7. Budapest, Hungari
Tregjet e Krishtlindjeve në Budapest shtrihen përgjatë të dyja brigjeve të Danubit dhe ofrojnë një pasqyrë të pasur mbi traditat festive hungareze. Dritat përreth Bazilikës, shfaqjet 3D mbi fasada dhe aroma e ëmbëlsirave që përhapet në ajër krijojnë një atmosferë që të mbetet gjatë në mendje.
6. Praga, Çeki
Arkitektura përrallore e Pragës krijon sfondin perfekt për tregjet e Krishtlindjes. Turistët mund të eksplorojnë arkitekturën mahnitëse baroke dhe gotike të qytetit, e cila duket edhe më magjike nën dritat e dimrit dhe borën e lehtë që bie. Gjatë vizitë ata mund të shijojnë Trdelník-un e ëmbël me kanellë dhe Svařák-un e ngrohtë (verë e zier me erëza).
5. Strasburg, Francë
Strasburgu mburret me titullin “Kryeqyteti i Krishtlindjeve”, pasi ka mbajtur traditën e tregjeve të Krishtlindjeve që nga viti 1570. Me turet e tij festive, ky qytet në kufirin francezo-gjerman ofron një përzierje të veçantë të traditave të të dy kulturave. Turistët mund të shëtisin nëpër tregjet e ndryshme të qytetit, nga Christkindelsmärik tradicional pranë katedrales deri te Village du Partage.
4. Zagreb, Kroaci
Edhe pse një qytet i vogë, Zagreb është surpriza e këtij viti. Turet përreth qytetit shpesh përfshijnë vizita në Upper Town, me pamje panoramike mbi gjithë vendin e ndriçuar përzier me përvoja kulinarie për të shijuar specialitetet lokale festive. Patinazhi në shesh, dritat dhe aromat e gatimeve të rrugës krijojnë një atmosferë të gjallë që mbush me energji edhe netët më të ftohta.
3. Nuremberg, Gjermani
Nurembergu ruan ende një nga përvojat më autentike ndër traditat festive europiane. Ky qytet i vjetër mesjetar kthehet në një fshat magjik, ku vizitorët mund të shijojnë Lebkuchen-in tradicional (biskotë me xhenxhefil), admirojnë lodrat prej druri të punuara me mjeshtëri dhe vëzhgojnë artizanët që krijojnë ornamente qelqi duke përdorur teknika të trashëguara brez pas brezi.
2. Amsterdam, Holandë
Kryeqyteti holandez mirëpret festat duke ndërthurur magjinë tradicionale me përvoja inovative. Vizitorët mund të udhëtojnë me varka përgjatë shtëpizave të ndriçuara, të shijojnë ëmbëlsira tradicionale holandeze si oliebollen dhe speculaas dhe të përjetojnë atmosferën festive nga Ice Village në Museumplein deri te pema madhështore në Dam Square.
1. Londër, Mbretëri e Bashkuar
Londra shndërrohet çdo dhjetor në një spektakël të vërtetë Krishtlindjesh. Shëtitjet tradicionale në tregjet viktoriane të Greenwich dhe Southbank, pallatet historike të zbukuruara me dekorime sezoni, larmia e atraksioneve festive; përfshirë pemën e madhe në Trafalgar Square dhe zbukurimet e Covent Garden; e bëjnë çdo vizitë të paharrueshme.
