Mijëra njerëz që morën pjesë në demonstrata masive që përfshinë të gjithë Izraelin pasi trupat e 6 pengjeve që mbaheshin nga Hamasi në Rripin e Gazës u gjetën të pajetë nga ushtarët të dielën. Protestuesit, shumë të veshur me flamuj izraelitë, u tubuan në qytetet kryesore, duke përfshirë Tel Avivin dhe Jerusalemin, duke kërkuar që qeveria të arrijë një marrëveshje për të siguruar lirimin e pengjeve të mbetura tek Hamasi pas sulmeve të 7 tetorit.
Demonstratat vijnë pasi një sindikatë e madhe izraelite, Histadrut, bëri thirrje për një grevë të përgjithshme mbarëkombëtare të hënën, duke i kërkuar qeverisë të arrijë një marrëveshje. Protestat e së dielës kanë qenë paqësore, por demonstruesit thyen linjat e policisë, duke bllokuar një autostradë kryesore në Tel Aviv. Teksa depërtuan nëpër linjat në autostradën Ayalon, protestuesit brohorisnin “Policë, policë kë po mbroni” dhe “Turp, turp”. Disa vunë zjarr në rrugë dhe mbuluan një urë me shirita të verdhë, një simbol i solidaritetit me pengjet.
Një protestuese e quajtur Noga Burkman i tha BBC-së se “nuk mund të qëndronte më në shtëpi”. “Njerëzit e kuptojnë se tani duhet të thyejnë rregullat dhe të bëjnë diçka”, duke shtuar se “sonte është vetëm fillimi”. Diku tjetër, në tubime shihej një përzierje të larmishme demonstruesish ku një grup skautësh të rinj që drejtonin brohoritjet. Të tjerë rrethuan dikë që mbante maskën e kryeministrit Benjamin Netanyahu, duke brohoritur: “Gjallë, gjallë, ne i duam ata të gjallë”.
Një tjetër mbante një tabelë ku shkruhej: “Ti je koka. Ti e ke fajin”. Në Jerusalem, një turmë masive demonstruesish u mblodh jashtë zyrës së kryeministrit. Një burrë 50-vjeçar i tha BBC-së se demonstratat ishin shumë më të mëdha se ato që i kishin paraprirë. “Është një lojë krejtësisht e ndryshme sot. Një shkallë ndryshe nga çdo gjë më parë.”
Ndër të pranishmit në protestat në Tel Aviv ishte 24-vjeçari Yotam Peer, vëllai 21-vjeçar i të cilit u vra më 7 tetor në sulmet e Hamasit. Ai i tha BBC-së: “Pasi dëgjuam për 6 pengjet, nuk mund të heshtnim më. Është vërtet e rëndësishme. Ne nuk kemi më zgjedhje”. Mediat lokale raportuan se edhe lideri i opozitës Yair Lapid ishte i pranishëm në protestë. Ish-kryeministri, i cili drejton partinë Yesh Atid, mbështeti më herët thirrjet për një grevë masive për të detyruar Netanyahun në një marrëveshje për lirimin e pengjeve. Familjet e pengjeve kanë bërë presion për një grevë mbarëkombëtare si pjesë e përpjekjeve për të arritur një marrëveshje armëpushimi midis qeverisë së Netanyahut dhe Hamasit.
Forumi i Familjeve të Pengjeve tha se 6 robërit, trupat e të cilëve u gjetën nga ushtria izraelite, “u vranë ditët e fundit, pasi mbijetuan pothuajse 11 muaj abuzime, tortura dhe urie në robërinë e Hamasit”. Kryeministri tha se ishte i përkushtuar për të siguruar një marrëveshje që liron robërit e mbetur dhe mbron sigurinë e vendit. Por ai tha: “Kushdo që vret pengjet – nuk dëshiron një marrëveshje.”
Nuk është e qartë se sa pengje kanë mbetur në Gaza. Hamasi rrëmbeu 251 njerëz dhe vrau 1200 të tjerë gjatë një sulmi në Izraelin jugor më 7 tetor 2023. Izraeli nisi një fushatë ushtarake hakmarrëse kundër Hamasit në Gaza. Më shumë se 40530 njerëz janë vrarë atje që nga 7 tetori, sipas ministrisë së shëndetësisë të territorit të drejtuar nga Hamasi. ©BBC
