Shtetet e Bashkuara kanë ngritur një padi historike kundër Apple, e cila akuzon gjigantin e teknologjisë për monopolizimin e tregut të smartfonëve dhe shtypjen e konkurrencës.
Në padi, Departamenti i Drejtësisë pretendon se kompania përdori kontrollin e saj të iPhone për të kufizuar ilegalisht konkurrentët dhe opsionet e konsumatorëve.
Departamenti e akuzon Apple-in për bllokimin e rritjes së aplikacioneve të reja dhe reduktimin e shfaqjes së produkteve rivale.
Apple është zotuar se do ta luftojë “fuqishëm” padinë dhe i mohon pretendimet.
Padia, e paraqitur në një gjykatë federale në Nju Xhersi, pretendon se Apple përdori “një seri rregullash deformuese” në një përpjekje për të “penguar inovacionin” dhe “mbytur” konkurrentët.
Në një deklaratë, Prokurori i Përgjithshëm Merrick Garland tha se kompania “minon aplikacionet, produktet dhe shërbimet që do t’i bënin përdoruesit më pak të varur nga iPhone … dhe që do mundësonin kosto më të ulëta për konsumatorët dhe zhvilluesit”.
Ankesa liston një sërë hapash “anti-konkurruese” që supozohet se janë ndërmarrë nga kompania, duke përfshirë bllokimin e aplikacioneve me funksionalitet të gjerë, shtypjen e shërbimeve celulare të transmetimit të cloud, kufizimin e kuletave dixhitale të palëve të treta dhe “zvogëlimin e funksionalitetit” të orëve inteligjente që nuk janë bërë nga kompania.
Në një konferencë shtypi të enjten, Garland tha se gjiganti teknologjik kishte “ruajtur monopolin e saj, jo thjesht duke qëndruar përpara konkurrencës për meritat, por duke shkelur ligjet federale ‘anti-trust’“.
“Konsumatorët nuk duhet të paguajnë çmime më të larta sepse kompanitë shkelin ligjin,” tha zoti Garland.
Ai vuri në dukje përvojën e përdoruesve të iPhone që dërgojnë mesazhe për telefonat inteligjentë që nuk janë të kompanisë, gjë që ai tha se çoi në “funksionalitet të kufizuar” duke përfshirë komunikime jo të mbrojtura dhe imazhe me piksel.
“Apple krijon barriera që e bëjnë jashtëzakonisht të vështirë dhe të shtrenjtë si për përdoruesit ashtu edhe për zhvilluesit të dalin jashtë ekosistemit të Apple,” tha zoti Garland.
Një zëdhënës i kompanisë, Fred Sainz, tha për mediat amerikane se padia ishte “e gabuar për faktet dhe ligjin” dhe se Apple “do të mbrohej fuqishëm kundër saj“.
“Padia kërcënon se kush jemi ne dhe parimet që i veçojnë produktet Apple në tregje me konkurrencë të ashpër”, tha Sainz. “Nëse (padia) do të jetë e suksesshme, do të pengonte aftësinë tonë për të krijuar llojin e teknologjisë që njerëzit presin nga Apple.”
Kjo shënon herën e tretë që Apple është paditur nga Departamenti i Drejtësisë që nga viti 2009 dhe është sfida e parë anti-trust (besim) kundër kompanisë nën administrimin e Presidentit Joe Biden, njofton BBC.
Apple është përballur me një reagim ligjor në rritje mbi ekosistemin e saj iOS dhe praktikat e biznesit. Muajin e kaluar, ajo u gjobit me 1.8 miliardë euro nga BE për shkeljen e ligjeve të konkurrencës mbi transmetimin e muzikës.
Firma kishte penguar shërbimet e këtyre aplikacioneve që mbajnë muzikë nga informimi i përdoruesve për opsionet e pagesave jashtë dyqanit të aplikacioneve Apple, tha Komisioni Evropian.
Komisionerja e Konkurrencës Margrethe Vestager tha se kompania kishte abuzuar me pozicionin e saj dominues në treg për një dekadë dhe urdhëroi gjigantin e teknologjisë të heqë të gjitha kufizimet. Apple tha se do të apelonte kundër vendimit.
Sipas Departamentit të Drejtësisë, pjesa e Apple në tregun amerikan të telefonave inteligjentë tejkalon 70%, dhe pjesa e saj në tregun më të gjerë të smartfonëve tejkalon 65%. /Përgatiti
