Misioni i parë në Hënë i Rusisë pas gati 50 vitesh nuk pati sukses. Sonda Luna-25 u përplas në sipërfaqen e Hënës dhe pushoi së ekzistuari, ka njoftuar agjencia ruse e hapësirës Roscosmos.
Dy ditë para uljes së planifikuar në Hënë, sonda ruse e hapësirës Luna-25 pësoi një incident të papritur, sipas autoriteteve. Agjencia ruse e hapësirës Roscosmos foli për një difekt teknik. Pas kësaj “situate të paplanifikuar”, Luna-25 u përplas në sipërfaqen hënore dhe pushoi së ekzistuari, shpjegoi Roscosmos. Arsyet e kësaj ndërprerjeje do të sqarohen.
Për t’u përgatitur që të ulej në sipërfaqen e hënës, sonda fillimisht ishte planifikuar të hynte në një orbitë të re të satelitit të Tokës të shtunën. Një situatë nuk lejonte që manovra të kryhej sipas parametrave të planifikuar, u bë më tej e ditur.
Siç ishte planifikuar, sonda duhej të ulej në veri të kraterit Boguslawski në polin jugor të Hënës, më pas të qëndronte në sipërfaqen e Hënës për një vit, duke mbledhur mostra shkëmbi atje dhe duke studiuar sipërfaqen e Hënës.
Luna-25 u nis javën e kaluar nga kozmodromi rus Vostochny drejt Hënës. Kamerat e instaluara në sondë kanë dërguar tashmë imazhet e para të Tokës dhe Hënës.
Ky është misioni i parë rus drejt Hënës që nga viti 1976. Me Luna-25, Rusia donte të vendoste lidhjen me sukseset e kaluara të Bashkimit Sovjetik në fushën e udhëtimeve në hapësirë.
