Donald Trump njoftoi shkarkimin e Sekretares së Sigurisë Kombëtare Kristie Noem dhe emërimin e senatorit republikan të Oklahomës, Markwayne Mullin në këtë detyrë. Noem u kritikua ashpër për politikat e saj të imigracionit dhe reagimin ndaj katastrofave.
Njoftimi u bë nëpërmjet mediave sociale të enjten, dy ditë pasi Noem u përplas me anëtarë të Kongresit si nga Partia Republikane ashtu edhe nga ajo Demokrate.
Trump tha se do ta emëronte Noem si “të dërguar të posaçme për sigurimin e Amerikës”, një iniciativë e re sigurie e fokusuar në hemisferën perëndimore.
Noem është sekretarja e parë që largohet në mandatin e dytë të Trump. Largimi i saj vjen pas një periudhe të trazuar me politikat e saj të zbatimit të ligjit për imigracionin, të cilat kanë shkaktuar protesta dhe padi.
Noem është përballur me kritika të ashpra, kryesisht për mënyrën se si e trajtoi goditjen kundër imigracionit dhe reagimin e departamentit të saj ndaj vrasjeve të dy protestuesve në Minneapolis nga oficerët e zbatimit të ligjit.
Ish-guvernatorja e Dakotës së Jugut është kritikuar gjithashtu për mënyrën se si departamenti i saj trajtoi miliarda dollarët që i ishin caktuar nga Kongresi.
Zhgënjimet për zbatimin e politikave të ashpra të imigracionit të Trump, veçanërisht pas tragjedisë në Minneapolis, si dhe trajtimi i fatkeqësive natyrore nga ana e saj, i hapën rrugën rënies së saj.
Në seancat dëgjimore në kongres këtë javë, ajo u kritikua ashpër nga demokratët dhe disa republikanë për mënyrën se si e trajtoi situatën.
Përveç çështjeve të imigracionit, Noem është kritikuar edhe nga republikanët për ritmin me të cilin u miratua financimi i emergjencës përmes Agjencisë Federale të Menaxhimit të Fatkeqësive (FEMA), si dhe për reagimin e përgjithshëm të administratës Trump ndaj fatkeqësive natyrore.
Mullin do të duhet të konfirmohet nga Senati, por sipas ligjit federal që rregullon vendet e lira të punës në degën ekzekutive, ai mund të shërbejë si sekretar i përkohshëm i Sigurisë Kombëtare derisa të përfundojë procesi i konfirmimit të tij.
