Një ngjarje e rëndë ka ndodhur në Tiranë. Një shtetas amerikan raportohet se ka mbytur me litar gruan e tij, 2 qentë si dhe më pas i ka dhënë fund jetës duke u vetëvarur.
Shtetasi amerikan Matthew James Wertz, 53 vjeç rezulton se është pedagog në një shkollë private në kryeqytet. Bashkëshortja e tij është identifikuar si Indah Lilis Sartika Saragih, me origjinë nga Indonezia.
Ngjarja ka ndodhur në banesën që ai kishte marrë me qira në kryqëzimin e rrugës “Valbona” me rrugën “Ramazan Ceku”.
Mësuesi nuk është paraqitur në shkollë sot, duke nxitur shqetësimin e kolegëve dhe drejtuesve të institucionit. Drejtori i shkollës është personi që ka shkuar në shtëpinë e Werts për ta kontrolluar dhe ka zbuluar ngjarjen tragjike.
Pas zbardhjes së ngjarjes dhe mbërritjes së policisë në vendngjarje, është gjetur një letër e lënë nga Werts për babanë e tij.
Në letrën e tij drejtuar të atit, ai shkruante: “Baba më fal, nuk ia dal dot. Më fal për çfarë bëra, ishte më e fortë se unë.”
Sakaq, autoritetet janë angazhuar në zbardhjen e motiveve që çuan në këtë akt ekstrem, teksa kolegë të tij kanë dëshmuar në polici mbi atë që kanë ditur. Policia gjeti fillimisht trupin e mësuesit dhe më pas edhe atë të bashkëshortes së tij. Paraprakisht besohet se gjithçka ka ndodhur në kushte të depresionit.
