Big Tech nënshkruan Kodin Evropian për Inteligjencën Artificiale, Meta refuzon
Kompanitë teknologjike që operojnë me modele të inteligjencës artificiale për qëllime të përgjithshme (GPAI) do të duhet të përmbushin detyrimet e Aktit Evropian për Inteligjencën Artificiale, i cili hyn në fuqi më 2 gusht. Deri më tani, 26 kompani kanë nënshkruar Kodin e Praktikës së IA-së të publikuar nga Komisioni Evropian në fillim të korrikut, një paketë rregullash vullnetare që synon të ndihmojë në përputhjen me kuadrin e ri ligjor. Kodi prek fusha si transparenca, mbrojtja e të drejtave të autorit dhe siguria e modeleve.
Gjigantët Amazon, Google, Microsoft dhe IBM janë në listën e nënshkruesve, së bashku me zhvilluesit e modeleve të IA-së si OpenAI, Mistral AI dhe Aleph Alpha. Nga ana tjetër, Meta ka refuzuar t’i bashkohet Kodit, duke e cilësuar si një pengesë për inovacionin dhe duke paralajmëruar se “Evropa po ndjek një drejtim të gabuar” në trajtimin e teknologjisë.
xAI, kompania pas chatbot-it Grok të platformës X, ka nënshkruar vetëm kapitullin mbi sigurinë dhe mbrojtjen, çka e detyron të tregojë përputhshmëri për transparencën dhe të drejtën e autorit me mjete të tjera. Edhe pse Google është pjesë e nismës, ka shprehur shqetësime për ndikimin që Kodi dhe Akti mund të kenë mbi zhvillimin e IA-së në Evropë. “Rrezikojmë të ngadalësojmë përparimin teknologjik,” paralajmëroi presidenti i çështjeve globale të Alphabet, Kent Walker.
Kompanitë që tashmë kanë hedhur në treg një model GPAI janë të detyruara ta nënshkruajnë Kodin përpara datës 1 gusht, ndërsa të tjerat mund të regjistrohen më vonë. Që nga 2 gushti, të 27 shtetet anëtare të BE-së duhet të kenë ngritur autoritetet kombëtare mbikëqyrëse, të cilat do të garantojnë zbatimin e ligjit. Parashikohen gjoba të rënda për shkeljet, deri në 15 milionë euro ose 3% të xhiros vjetore të kompanive.
