Janë publikuar fotot e 29-vjeçarit, Ragip Gila, autorit të masakrës që u regjistrua paraditen e sotme në një lokal pranë bashkisë së Shkodrës.
Teksa ishte në lëvizje me motor, Gila qëlloi më breshëri plumbash në lokalin ku gjeti vdekjen e menjëhershme Armando Pali. Më pas autori arriti që të largohet me një automjet tip BMW ngjyrë gri, me të cilin u aksidentua në dalje të qytetit teksa po tentonte t’i ikte policisë. Pas aksidentit ka tentuar që të ikë në këmbë drejt lumit Kir, por është kapur nga forcat Shqiponja.
Ragip Gila nuk është një person i panjohur për policinë. Ai kishte dalë nga burgu pak muaj më parë, pasi ishte arrestuar në 6 dhjetor 2023, sepse në banesën e tij në lagjen Partizani në Shkodër iu gjet arsenal armësh që dyshohet se do të përdoreshin nga grupe kriminale, për të kryer krime kundër personit dhe pronës.
Gjatë operacionit “Imazhi fals” u sekuestruan 7 jelekë antiplumb, 2 palë doreza, 3 maska, 2 paruke, municion luftarak, 1 kokore metalike, 1 armë gjahu dhe sende të tjera të kundërligjshme, si dhe sasi lënde të dyshuar narkotike kanabis. Në atë kohë, blutë arrestuan në flagrancë Ragip Gilën, për veprat penale “Prodhimi dhe shitja e narkotikëve”, “Prodhimi dhe mbajtja pa leje e armëve luftarake dhe municionit” dhe “Prodhimi dhe mbajtja pa leje e armëve të gjuetisë dhe sportive”.
Nga të shtënat ndërroi jetë në spital dhe Liridon Kraja, shoferi dhe shoqëruesi i Erogen Vasos Bajrit, i cili dyshohet se ishte dhe shënjestra e atentatit të rëndë. Vaso dhe një grua që po pinte kafe në lokal në momentin fatal mbetën të plagosur dhe ndodhen në spital.
