E bujshme, Manchester City mund të ketë humbur titullin në Merseyside: 3-3 me Everton
Everton dhe Manchester City kanë barazuar në një ndeshje spektakolare, ndërsa City mbeti në garë për titullin e Premier League. Shpresat për titull të Citizens kanë pësuar një goditje pasi arritën vetëm një barazim në Merseyside. Ndalimi i Manchester City ndaj Everton i jep një shtysë të madhe shpresave të Arsenal për titullin e Premier League.
Pas një pjese të parë të dominuar kryesisht nga Manchester City, Jeremy Doku kaloi në avantazh miqtë në minutën e 43’ me një goditje të shkëlqyer me të majtën nga jashtë zone, që u harkua lehtë dhe përfundoi në cepin e largët të portës, duke mposhtur Jordan Pickford. Zëvendësuesi i Everton, Thierno Barry, barazoi në minutën e 68’ pas një gabimi të rëndë nga Marc Guehi në zonë, teksa tentoi të pasonte topin prapa drejt portierit. Pesë minuta më vonë, vendasit, që konsideroheshin si të nënvlerësuar, kaluan në avantazh kur Jake O’Brien shënoi me kokë pas një goditjeje këndi të ekzekutuar nga James Garner.
Evertoni dukej sikur e kishte mbyllur ndeshjen në minutën e 81’, kur Merlin Rohl shërbeu topin te Barry për një gol të lehtë, duke i dhënë vendasve epërsinë 3-1. Megjithatë, pothuajse menjëherë më pas, diferenca u ngushtua, pasi Erling Haaland depërtoi në qendër dhe shënoi një gol shumë të rëndësishëm për skuadrën e teknikut Guardiola. City arriti më pas të rrëmbente një pikë në mënyrë dramatike në minutat shtesë, kur Doku realizoi golin e tij të dytë spektakolar të ndeshjes, një kopje e të parit nga krahu i djathtë, duke siguruar barazimin 3-3.
CHELSEA-NOTTINGHAM FOREST 1-3
Nottingham Forest befasoi një Chelsea në formë të dobët duke e mposhtur 3-1 në Stamford Bridge, për t’u shkëputur me gjashtë pikë nga zona e rënies nga kategoria në Premier League dhe për të dhënë një paralajmërim të fortë për Aston Villa përpara ndeshjes së kthimit të gjysmëfinales së Europa League të enjten.
Ndërsa tifozët vendas shpërthyen në zemërim pas humbjes së gjashtë radhazi në Premier League për Blues, e cila vë në dyshim serioz edhe shanset e tyre për kualifikim në kompeticionet europiane, vizitorët festuan një fitore bindëse që pak kush do ta kishte parashikuar kur u publikuan formacionet.
Vitor Pereira bëri tetë ndryshime në formacionin titullar, duke pasur në mendje ndeshjen ndaj Villians në Europa League. Por kjo rezultoi një lëvizje e zgjuar taktike nga trajneri, pasi fillimisht lojtarët më pak të aktivizuar shfrytëzuan mundësinë e tyre, përpara se yjet e skuadrës ta çonin ekipin drejt fitores. Perspektivat e Forest janë përmirësuar si në kampionat, ashtu edhe në arenën europiane.
