Të shtëna me armë në një kafene në Agios Panteleimonas, plagoset një 10 vjeçare shqiptare.
Greqi – Persona të panjohur hapën zjarr nga brenda një makine – Nëna e 10-vjeçares e çoi atë në spital
Një alarm u dha vonë natën e së premtes, më 25 shtator, në Agios Panteleimonas , pas një sulmi të armatosur nga persona të panjohur në një kafene, që rezultoi në plagosjen e një fëmije të mitur.
Konkretisht, sulmi ndodhi rreth orës 23:50. Një makinë, me katër persona në bord, iu afrua kafenesë “Amora” në rrugën Agorakritou nr. 32. Autorët hapën zjarr nga brenda automjetit në lëvizje (sipas informacioneve me mitraloz), duke synuar fasadën e dyqanit, brenda të cilit në atë kohë ndodheshin afërsisht 10 klientë, të gjithë me origjinë të huaj.
Vajza 10-vjeçare e pronarit të biznesit, e cila është me origjinë shqiptare, u plagos në këmbën e majtë (në zonën e pulpës) nga të shtënat me armë zjarri. Në panik, nëna e fëmijës nuk priti ambulancën dhe e transportoi menjëherë fëmijën në Spitalin e Fëmijëve “Aglaia Kyriakou” me automjetin e saj.
Jeta e vajzës për fat të mirë nuk është në rrezik, ndërsa autoritetet po shqyrtojnë nëse lëndimi është shkaktuar direkt nga një plumb apo nga fragmente të sulmit.
Autorët u larguan, megjithatë, sipas informacioneve, makina që përdorën në sulm u gjet e djegur pak kohë më vonë në zonën e Aspropirgos, në një përpjekje për të fshehur gjurmët.
Policia greke ka nisur një kërkim për t’i gjetur dhe arrestuar ata, ndërkohë që ka mbledhur edhe pamjet filmike të kamerave dhe dëshmitë me qëllim sqarimin e plotë të motiveve të sulmit
