Saranda mirëpriti grupin e motoristëve SteelWings Albania, në një atmosferë të ngrohtë, të mbushur me energji, miqësi dhe pasion për motorët dhe udhëtimet në rrugë.
Klubi i motoristëve SteelWings Albania ka zgjeruar aktivitetin e tij edhe në qytetin bregdetar, duke krijuar zyrtarisht degën e Sarandës. Me rastin e hapjes, rreth 60 motoristë nga qytete të ndryshme të Shqipërisë mbërritën në Sarandë për të festuar këtë moment të veçantë.
Takimi bëri bashkë miq të vjetër dhe të rinj, të cilët i bashkon pasioni për motorët, veçanërisht për markën ikonike Harley-Davidson. Përmes këtij organizimi u forcua edhe më shumë fryma e komunitetit, miqësia dhe dëshira për të ndarë së bashku eksperiencat në rrugë.
Një moment i rëndësishëm i aktivitetit ishte anëtarësimi zyrtar i pesë motoristëve të rinj nga Saranda në familjen SteelWings Albania, duke hedhur kështu themelet e kapitullit të parë zyrtar të klubit në këtë qytet.
Me krijimin e degës së re, motoristët e Sarandës do të kenë tashmë një pikë të përbashkët takimi, nga ku mund të organizojnë udhëtime, aktivitete dhe të mirëpresin të tjerë të apasionuar pas botës së motorëve.
Një tjetër komunitet i shtohet kështu jetës së Sarandës, duke sjellë më shumë gjallëri, energji dhe adrenalinë, por mbi të gjitha duke promovuar miqësinë dhe pasionin që i bashkon njerëzit përtej distancave.
